Translations are evolving and should be taken as indicative only! For a guide to the tones and the spelling system used to write this variety of Isaan (Khon Kaen), see the "tone guide" on the overview page.

Tones: M = mid, HR = high-rising, H = high, HF = high-falling, LF = low-falling

Isaan	Pronunciation	Tones	Thai	English/Notes	#occ
ตง	toŋ	M	ตรง	1. at 2. to be precise at, to be exact {ห้าโมงตง = exactly five o'clock} 3. straight	30/17

Link to overview page
Link to dictionary

Basic vocabulary — page 14 — Series A, pictures 11-14: clock, hour, minute

11 นี้คือนาลิกา เวลาห้าโมงตง
12 เวลาห้าโมงยี้สิบนาที*
13 เวลาห้าโมงเคิ่ง
14 เวลาห้าโมงสี่สิบห้านาที

*should be เวลาห้าโมงสิบห้านาที

Basic vocabulary — Page 31 — Series B, pictures 03: skin color

3
อันนี้คือพุใด อันนี้กะเป็นคนคือกัน มีพุหญิงกับพุซายสองคน กำลังยืนเฮียงกันอยู่
มีคนดำพ้อม คนขาวพ้อม แล้วกะคนสีพอก่ำๆ พ้อม
แล้วพุใดเป็นคนขาว กะมีคนขาวพุหนึ่ง เป็นพุซายเนาะ กะเป็นพุซาย อยู่ฝั่งซ้ายมือ
แล้วกะมีคนดำพ้อม กะเป็นพุซายคือกัน คนดำๆ นั้นกะยืนอยู่ฝั่งขวา
แล้วกะมี เป็นพุหญิง อยู่ตงกางเนาะ เป็นพุหญิงผิวพอก่ำๆ หนิหละ ผิวออกน้ำตานหนิหละ บ่ดำหลาย บ่ขาวหลาย

Vocabulary recordings — Planting rice 05

แล้วกะอีกวิทีหนึ่งเนาะเป็นวิที เขาเอิ้นว่ากานดำนา ดำไฮ่ดำนานี้หละเนาะ ขั้นตอนแลกเฮากะสิมีเม็ดพันคือกันนั้นหละ เม็ดพันกะสิ แล้วแต่คนสิเอาเม็ดพันแบบใดมา กะอาดสิเป็นเม็ดพันคือกันกับกานผายเข้าเลยเนาะ ขั้นตอนแลกกะเอาเข้าไปแซ่คือกัน แล้วแต่พุใดสิแซ่โดนบ่โดน สองสามมื้อกะได้ กะเอาแซ่ไว้ แล้วกะ ขั้นตอนแลกเฮากะเอาเข้าที่แซ่นั้นหละไปหว่านในไฮ่นา บ่ต้องให้ใหญ่ปานใด แล้วแต่ปะลิมานเข้า เฮาสิเอาเข้าซุมนี้ไปหว่านในไฮ่ตงนั้นที่เฮาไถฮุด หลือว่าไถนาดินไว้งามแล้ว พ้อมที่สิเอาเข้านี้ไปหว่านแล้ว

Vocabulary recordings — Planting rice 08

กานดำนี้กะเอาต้นก้าหละปะมานสามสี่ต้นจุ่มลงไป สามสี่ต้นหลือว่าสี่ห้าต้นกะได้ แล้วแต่คนสิจับได้ต้นก้าต้นนั้นไปดำ กานดำเหน้กลงไป เหน้กใส่ขี้ดินเนาะ นิ้วโป้กับนิ้วซี้เฮานี้หละจับตง ตงกกต้นก้านั้นหละ แล้วกะเสียบลงไปในขี้ดิน หลือว่าเหม้ๆ ลงไปในขี้ดินเนาะ เพื่อที่สิให้ฮากก้า ฮากต้นก้านั้นติดลงไปในขี้ดิน เพื่อที่สิให้มันเกิดขึ้นมา หลือว่าใหญ่ขึ้นมาเนาะ กานดำนี้กะคือวางละยะคือตาข่ายนี้หละเนาะ ลูบตาข่ายกะ เหน้กๆ ใส่ขี้ดิน บ่ต้องถี่หลาย กะห่างๆ พอสมควน เพื่อที่สิให้เข้ามันใหญ่ บ่แออัด หลือว่าต้นกะ ต้นเข้า บ่ให้มันหนาเกินไปเนาะ พอเฮาดำเลียบล้อยแล้ว เฮากะถ้าจนมันใหญ่ จนได้เกี่ยวเข้าพุ้นหละเนาะ

Basic vocabulary — Page 31 — Series B, pictures 01-02: heart, brain

1
นี้คืออี่หยัง อันนี้เป็นหัวใจ หัวใจของคน เป็นอะวัยยะวะของคนอย่างหนึ่ง
หัวใจมันสีอี่หยัง หัวใจมันเป็นสีแดง
แล้วหัวใจหนิมันอยู่หม้องใดของล้างกายคน มันกะอยู่เลาะๆ หน้าเอิกเนาะ หลือว่าอยู่ตงกางของลำโตหนิหละเนาะ
หัวใจหนิมันใหญ่บ่ กะบ่ใหญ่ปานใด กะปะมานสองกำปั้นเนาะ กะบ่ใหญ่คัก กะสิพอปะมานพอดี ปะมานสองสามกำปั้นล่วมกันเนาะ

2
อันนี้คืออี่หยัง อันนี้กะเป็นสะหมองของคน
หลือว่าเบิ่งลูบ เบิ่งล้างมันเนี้ย ปะมานว่าเป็นสะหมองของคนเนาะ
กะเป็นอะวัยยะวะอีกอย่างหนึ่งของคนคือกัน
มันมีหน้าที่อี่หยัง สะหมองนี้กะมีหน้าที่เอาไว้ถ้าคิด เอาไว้ถ้าจดจำบางสิ่งบางอย่าง หลือว่าเกียบทุกอย่างที่เฮาคิดพ้อ หลือว่าเฮาได้ลับลู้ไป
แล้วสะหมองหนิมันอยู่ส่วนใดของคน สะหมองหนิมันสิอยู่เทิงหัวกะโหลกของคนเนาะ หลือว่าอยู่เทิงหัวของคนหนิหละ อยู่เทิงหัวสุด มันกะอยู่หม้อง หม้องกะโหลกหัวนั้นของเฮาเนาะ

Basic vocabulary — page 14 — Series B, pictures 11-14: clock, hour, minute

11
นี้คืออี่หยัง นี้คือนาลิกา นาลิกาเป็นซงวงกม เป็นลูบวงกม
นาลิกาสีขาว ขาวจุ่นพู่นอยู่ ขอบนาลิกากะเป็นสีดำ เป็นวงกมคือกัน
นาลิกามีไว้เฮ็ดหญัง นาลิกามีไว้ถ้าเบิ่งเวลา ไว้ถ้าบอกเวลา
ขั้นมีนาลิกา เฮากะสิฮู้ว่า ตอนนี้จักโมงแล้ว ตอนนี้เวลาเท่าใดแล้ว เฮากะสิฮู้ เพาะว่าเฮาเบิ่งนาลิกา แล้วเฮากะสิลู้เวลา
ตอนนี้นาลิกาจักโมงแล้ว ตอนนี้นาลิกาห้าโมงตง หลือห้านาลิกาพอดี
ตอนนี้เข็มนาลิกาอ่วยไปทางใด ตอนนี้เข็มนาลิกาอ่วยไปใส่เลขห้า เข็มใหญ่อ่วยไปทางเลขห้า เข็มน้อยอ่วยไปหม้องเลขสิบสอง
สะหลุบแล้วว่า เฮากะสิฮู้เวลา เฮากะสิเบิ่งเวลาออก เพาะว่าเฮาเบิ่งจากเข็มนาลิกา มันอยู่หม้องใด มันอยู่เลขใด เฮากะสิเบิ่งเวลาถืก

12
นี้คืออี่หยัง นาลิกาคือกันแม่นบ่ แม่น อันนี้กะนาลิกาคือกัน อันนี้กะเป็นนาลิกา
ตอนนี้เวลาจักโมงแล้ว ตอนนี้เวลาห้าโมงสิบห้านาที เพาะว่าเข็มนาลิกา เข็มใหญ่มันอ่วยไปใส่เลขห้า เข็มน้อยนาลิกามันอ่วยไปใส่เลขสาม สะหลุบแล้วเวลากะห้าโมงสิบห้านาที

13
ตอนนี้เวลาจักโมงแล้ว ตอนนี้เวลาห้าโมงเคิ่ง หลือเวลาห้าโมงสามสิบนาทีนั้นหละ

14
ตอนนี้เวลาจักโมงแล้ว ตอนนี้เวลาห้าโมงสี่สิบห้านาที
เข็มนาลิกาเข็มใหญ่มันยังอยู่เลขห้าอยู่ แล้วเข็มน้อยมันกะอยู่ที่เลขเก้า สะหลุบแล้วเวลากะห้าโมงสี่สิบห้านาที
แล้วตอนนี้เวลามันฮอดหกโมงไป่ บ่ มันทันได้ฮอดหกโมงอยู่ ตอนนี้มันห้าโมงกว่าๆ หนึ่ง บ่ทันได้ฮอดหกโมงเลย
ขั้นเข็มนาลิกาเข็มใหญ่อยู่เลขหก แล้วเข็มน้อยเลยเลขสิบสองไป มันกะสิฮอดหกโมง ตอนนี้เหลียเวลาอีกสิบห้านาที มันจั่งสิฮอดหกโมง หลือหกนาลิกานั้นหละ

Basic vocabulary — page 09 — Series B, pictures 06-08: light, switch, to switch on/off, bright/dark

6
นี้คืออี่หยัง นี้คือหลอดไฟ
หลอดไฟอันใหญ่บ่ บ่ หลอดไฟอันบ่ใหญ่ หลอดไฟอันน้อยๆ
หลอดไฟติดอยู่ใส หลอดไฟติดอยู่เทิงเพดานบ้าน
ขั้นมีหลอดไฟแล้ว มันต้องมีสะวิดเปิดไฟนำบ่ มีอยู่ ต้องมีสะวิดเปิดไฟพ้อม
แล้วสะวิดเปิดไฟติดอยู่ใส สะวิดเปิดไฟติดอยู่ข้างฝาบ้าน หลือข้างกำแพงบ้าน

7
เขากำลังเฮ็ดหญัง เขากำลังเปิดไฟ เขาใซ้มือของเขาเด่ไปเปิดสะวิดไฟ
ขั้นบ่เอามือไปเปิดสะวิดไฟ ไฟกะสิบ่ติด ไฟกะสิบ่เห็นฮุ่ง
ตอนนี้ไฟมันฮุ่งบ่ ฮุ่งอยู่ ตอนนี้ไฟมันฮุ่ง ไฟมันฮุ่งบักคัก
แล้วเป็นหญังไฟมันคือฮุ่ง มีคนไปเปิดไฟ ไฟมันกะเลยฮุ่ง ไฟมันกะเลยให้แสงสะหว่าง
ขั้นเฮาเปิดไฟ มันต้องใซ้ไฟฟ้าบ่ ใซ้อยู่ มันต้องใซ้ไฟฟ้าพ้อม
ขั้นเฮาเปิดไฟ มันต้องใซ้ไฟฟ้า มันต้องใซ้พะลังงานไฟฟ้า
ขั้นเฮาเปิดไฟเบิดมื้อเบิดค่ำ มันกะสิเปียงไฟ มันกะสิใซ้ไฟฟ้าหลาย

8
เขากำลังเฮ็ดหญัง เขากำลังปิดไฟ
เขาใซ้นิ้วของเขาเด่ไปเปิดไฟ เขาใซ้นิ้วของเขาเด่ไปปิดไฟตงปุ่มสะวิดสีแดง
พอเขากดปิดสะวิดไฟแล้ว ไฟมันกะสิดับ ไฟมันกะสิบ่เห็นฮุ่ง
ขั้นเขาปิดไฟแล้ว มันสิมืดบ่ มืดอยู่ ขั้นเขาปิดไฟแล้ว มันกะสิมืด มันกะสิบ่เห็นฮุ่ง มันกะสิบ่มีแสงสะหว่างเลย
ตอนนี้มันเห็นฮุ่งบ่ บ่ มันบ่เห็นฮุ่ง มันมืด มันเลยบ่เห็นฮุ่ง
เป็นหญังเขาคือปิดไฟ บ่ลู้คือกัน เขาอาดสินอน หลืออาดสิออกจากบ้านแล้วกะได้ เขากะเลยปิดไฟ เพื่อที่สิบ่ได้ใซ้พะลังงานไฟ แล้วมันกะสิเฮ็ดให้บ่เปียงไฟกะได้

Basic vocabulary — Page 26 — Series B, pictures 11-14: to lie, sofa, to read, book, tiger, cat, to sleep

11
พุซายคนนี้เขากำลังเฮ็ดหญังอยู่ เขากำลังนอนอยู่
อาดสินอนหลับอยู่ นอนอยู่เทิงโซฟา โซฟาอันบักใหญ่พุ้นแหล้ว โซฟาสีเหลียง
เขากะนอนอยู่พุเดียวของเขานั้นหละ นอนซันขา ขึ้นขาหนึ่งพุ้นแหล้ว ขาหนึ่งกะเหยียดตงที้ลี้พุ้นแหล้ว มืออีกข้างหนึ่งเขากะวางอยู่เทิงอกของเขาเนาะ แล้วกะกำลังนอนอยู่ คือสินอนแซบ นอนนัวคักเนาะ เหลียวเบิ่งนอนหลับ บ่ฮอดมืนตาซ้ำ
แล้วพุซายคนนี้เขานอนเฮ็ดหญัง กะจักหละเด้อ จักว่าเขานอนเฮ็ดหญัง เขากะอาดสิเมี่ยย อาดสิล้า อาดสิมาจากหม้องเฮ็ดงาน อาดสิเซาเมี่ยยกะได้ เขากะเลยนอนหลับ ปะมานนั้นเนาะ

12
เขากำลังเฮ็ดหญัง กะมีพุซายพุหนึ่งนั้นหละ เขากำลังนอนอยู่ นอนอยู่เทิงโซฟา นอนอ่านหนังสือเนาะ
มือสองข้างจับหนังสือเหล้มหนึ่งขึ้นมา แล้วกะซันที้ลี้ขึ้น แล้วกะกำลังแนมเบิ่ง อาดสิอ่านเบิ่ง หลือว่าอ่านหนังสืออยู่กะได้เนาะ
ขาของเขาข้างหนึ่งกะซันขึ้น ขาข้างหนึ่งกะเหยียดที้ลี้ ตงที้ลี้ไปพุ้นหละเนาะ

13
อันนี้เป็นสัด สัดชะนิดหนึ่งเนาะ เป็นเสีย เขาเอิ้นว่าเสีย เสียกะเป็นสัดชะนิดหนึ่งนั้นหละ
เสียนี้เป็นสัดดุล้ายบ่ หลือว่าดุ หลือว่าฮ้ายคักบ่ ฮ้ายคักเด้อสัดหนิ เสียเนี้ย ฮ้ายคัก
มันกินเนี้ยเป็นอาหาน กินเนี้ยเป็นอาหานเนาะ
เบิ่งลักสะนะท่าทางหลือว่าของแท้เนี้ย มันเป็นตาย้านบ่ ปัดโท เป็นตาย้านคักเด้อ เป็นตาย้านอี่หลี เสียนี้ บ่ก้าอยู่ใก้ พุใดกะบ่ก้าอยู่ใก้มันดอก เพาะว่ามันตาย้าน ตาย้านคักอี่หลี

14
อันนี้คืออี่หยัง อันนี้เป็นแมว อันนี้คือแมว
แมวมันกำลังนอนอยู่ นอนหลับ ตุ้ยพุ้นแหล้ว บ่เบิ่งหน้า บ่เบิ่งหลัง บ่เบิ่งฟ้าเบิ่งไฟอี่หยังเลย นอนอยู่โตเดียวข้อหล้อของมันนั้นหละ คือสิมีความสุขหลาย
แล้วมันนอนเฮ็ดหญัง มีคือสิเมี่ยย มันคือสิเซาเมี่ยยนั้นหละ มันกะเลยนอนเนาะ

Basic vocabulary — page 11 — Series B, pictures 01-03: candle, to light, match, lighter

1
นี้คืออี่หยัง นี้คือเทียน
เทียนแท่งสีขาว มีเทียนแท่งเดียว
เทียนเฮ็ดมาจากอี่หยัง เทียนเฮ็ดมาจาก[ขี้ผึ้ง]*
เทียนใซ้จั่งใด เทียนเอาไว้ถ้าจุด เทียนเอาไว้ถ้าไต้ไฟ
อยู่ในใจกางของเทียน สิมีเส้นด้ายอยู่ เอาไว้ถ้าจุดไฟ หลือเอาไฟมาจุดตงด้ายนี้ แล้วมันกะสิเกิดแสงสะหว่าง
เทียนขั้นจุดแล้ว มันสิให้แสงสะหว่างบ่ ให้อยู่ มันสิให้แสงสะหว่าง
ขั้นจุดเทียนหม้องใด หม้องนั้นกะสิฮุ่ง หม้องนั้นกะสิมีแสงสะหว่าง เฮ็ดให้บ่มืด

2
เขากำลังเฮ็ดหญัง เขากำลังไต้เทียน เขาใซ้ไม้ขีดไต้เทียน
ไม้ขีดอี่หยัง กะไม้ขีดไต้เทียน ไม้ขีดมันสิมีไฟอยู่ในไม้ขีด ขั้นเอาไม้ขีดนี้ไปไต้เทียนแล้ว เทียนกะสิติด เทียนกะสิเห็นฮุ่ง
ไม้ขีดเฮ็ดมาจากอี่หยัง ไม้ขีดเฮ็ดมาจากไม้
แล้วอยู่หัวไม้ขีด สิมีเซื้อเพิงอยู่ เฮ็ดให้มีไฟ หลือสามาดจุดไฟได้
ไม้ขีดอันหนึ่ง ใซ้ได้เที่ยหนึ่ง บ่สามาดใซ้ได้หลายเที่ย
เทียนขั้นเฮาใซ้งานไปเลี้ยยๆ แล้ว หลือใซ้งานโดนๆ แล้ว มันสิเบิดเป็นบ่ เบิดเป็นอยู่
เทียนขั้นเฮาใซ้งานไปเลี้ยยๆ มันกะสิละลาย มันกะสิเปี่ยยไปเลี้ยยๆ แล้วมันกะสิเบิดไป
ตอนนี้จุดเทียนแล้ว เทียนมันให้แสงสะหว่างแม่นบ่ แม่นอยู่ เทียนมันให้แสงสะหว่าง ตอนนี้มันกำลังเห็นฮุ่งอยู่

3
เขากำลังเฮ็ดหญัง เขากำลังไต้เทียน
เขาเอาอี่หยังไต้เทียน เขาเอาไฟแซ็กไต้เทียน
ไฟแซ็กเป็นจั่งใด ไฟแซ็กเป็นเซื้อเพิง มีเก่ดอยู่ในไฟแซ็กอันนั้น สามาดเฮ็ดให้ไฟติดได้ สามาดเฮ็ดให้มีไฟได้ แล้วกะสามาดไต้เทียนได้
ไฟแซ็กเฮ็ดมาจากอี่หยัง ข้างนอกไฟแซ็กเฮ็ดมาจากพะสะติก แล้วข้างในไฟแซ็กนั้นสิมีเก่ดอยู่
ไฟแซ็กใซ้ได้โดนบ่ ใซ้ได้โดนอยู่ ใซ้ได้หลายเที่ย โดนบักคักหนึ่ง
ไฟแซ็กมีเปวไฟแม่นบ่ แม่น ไฟแซ็กมีเปวไฟ เพาะว่าไฟแซ็กมันมีเก่ดอยู่ มันกะเลยเฮ็ดให้มีเปวไฟได้

*should be LF-LF, probably interference from standard Thai

Basic vocabulary — Page 31 — Series B, pictures 14-17: morning, noon, afternoon, evening

14
อันนี้คืออี่หยัง อันนี้กะเป็นทัมมะซาดเนาะ กะเป็นบันญากาดญามมื้อเซ้าเนาะ กำลัง พะอาทิดกำลังสิ กำลังสิขึ้นจากดิน กำลังสิขึ้นไปเทิงฟ้าเนาะ กำลังสิลอยขึ้นๆๆ เนาะ
กะเป็นอากาดที่บอลิสุด หลือว่าเป็นอากาดที่บ่ฮ้อน
ส่วนมากแล้วคนสิมักอากาดญามมื้อเซ้าเนาะ เป็นอากาดที่สดซื้นหลือว่า[สดซื้น]เนาะ เพาะว่าพะอาทิดกำลังขึ้น มันบ่ฮ้อนปานใด เป็นอากาดที่เย็นๆ เนาะ คนกะสิมักอากาดญามมื้อเซ้าเนาะ
แล้วกะเบิ่งทัมมะซาดหม้องนี้ แล้วกะมีพูเขาพ้อม มีต้นไม้หลายต้นพ้อม มีทองฟ้าสีฟ้าพ้อม โอ๊ย เป็นตาไปเนาะ อาดสิเป็นทัมมะซาดที่คนอยากไปหม้องนี้เนาะ

15
อันนี้คืออี่หยัง อันนี้กะเป็นทัมมะซาดเนาะ เป็นทัมมะซาด
อาดสิเป็นญามเที่ยง เป็นตอนเที่ยงเนาะ เพาะว่าพะอาทิดกำลังขึ้นเทิงทองฟ้าแล้ว อาดสิขึ้นฮอดกางๆๆ ทองฟ้าแล้ว
แล้วเฮาสิฮู้ได้จั่งใดว่าเป็นญามมื้อเซ้า หลือว่าเป็นญามเที่ยง หลือว่าตอนนี้มันญามเที่ยง เฮาสิฮู้ได้จั่งใด เฮากะเบิ่งง่ายๆ ว่าขั้นพะอาทิดตงหัวเฮา หลือว่าเฮาแนมขึ้นไปเทิงฟ้าเนี้ย แล้วพะอาทิดอยู่ตงหัวเฮาพอดี มันกะสิเที่ยงตงพอดี
ขั้นพะอาทิดมันหัวกะขึ้น มันสิเป็นญามเซ้า แต่ว่าขั้นพะอาทิดมันตกดินแล้วกะสิเป็นญามแลงเนาะ แต่ว่าตอนนี้พะอาทิดมันอยู่เทิงหัวเฮากะสิเป็นตอนเที่ยงพอดี
อากาดกะกำลังฮ้อน กำลังฮ้อนคักนั้นหละ บ่เย็น บ่หนาว แต่ว่าฮ้อนเนาะ เพาะว่าอาทิดมันกำลังขึ้นฟ้า

16
อันนี้คืออี่หยัง อันนี้กะเป็นทัมมะซาดเนาะ กะเบิ่งลักสะนะแล้วกะกำลังสิค่ำ
แต่ว่ากะสิเป็นญามบ่ายๆ อยู่เนาะ กำลังปะมานบ่ายสาม บ่ายสี่ หลือว่าห้าโมงแลง ปะมานนี้เนาะ กำลังสิค่ำ พะอาทิดกำลังสิตกดิน
กำลังสิเบิดฮ้อนไป เพาะว่าพะอาทิดกำลังสิตกดิน กำลังสิอ่วยลงดิน กำลังสิมุดดินลงไปเนาะ

17
อันนี้คืออี่หยัง อันนี้กะเป็นทัมมะซาดเนาะ กะกำลังสิ กำลังสิค่ำ กำลังสิมืดเนาะ
แล้วปะมานนั้น ขั้นพะอาทิดตกดินเนี้ย มันสิปะมานจักโมง กะสิปะมานหกโมงแลง หลือว่าทุ้มหนึ่ง ปะมานนี้ พะอาทิดกะสิตกดินเลียบล้อยแล้ว
ปะมานหกโมงเนี้ย พะอาทิดกำลังสิอ่วยลงไปตกดิน
ปะมานทุ้มหนึ่งพะอาทิดตกดินเลียบล้อยแล้วเนาะ ขั้นเป็นในพากอี่สาน
แล้วมันกะสิมืดหลังจากที่พะอาทิดตกดินไปแล้ว แล้วอากาดหลือว่าบันญากาดกำลังกะสิมืดไป

Basic vocabulary — page 14 — Series B, pictures 01-04: paper, pen, to write, scissors, to cut

1
นี้คืออี่หยัง นี้คือกะดาด กะดาดหลายแผ่น กะดาดแผ่นสีขาว ขาวจุ่นพู่นอยู่ แผ่นบักใหญ่หนึ่ง
กะดาดมันเป็นลูบสี่เหลี่ยม มันเป็นซงสี่เหลี่ยม ตงดีๆ
กะดาดมันเอาไว้เฮ็ดหญัง กะดาดเอาไว้เขียน เอาไว้วาดลูบ เอาไว้ใซ้งาน สามาดเฮ็ดได้หลายอย่าง
กะดาดมันเฮ็ดมาจากอี่หยัง กะดาดเฮ็ดมาจากไม้ เฮ็ดมาจากพืด คนเฮาสิตัดไม้ หลือเอาไม้นั้นมาลีไซเคินเฮ็ดเป็นกะดาด
ขั้นเอากะดาดหลายๆ แผ่นมาลวมกันๆ หลายๆ มันกะสิกายเป็นสะหมุด หลือเฮ็ดเป็นสะหมุดได้
ขั้นมีกะดาดอยู่แผ่นเดียว เขากะสิเอิ้นว่ากะดาด ขั้นเอากะดาดหลายแผ่นมาลวมกันเฮ็ดเป็นปึกๆ เขากะสิเอิ้นว่าสะหมุด
ตอนนี้กะดาดมีฮอยเขียนบ่ บ่ ตอนนี้กะดาดมันยังว้างเป่าอยู่ บ่มีฮอยเขียนอี่หยังเลย

2
นี้คืออี่หยัง อันนี้กะกะดาดคือกัน เป็นกะดาดหลายแผ่นคือกัน ตอนนี้เขากำลังเขียนกะดาดอยู่
เขากำลังเขียนอี่หยังบุอยู่ในกะดาด เขาใซ้ปากกาเขียนอยู่ในกะดาดนั้น อาดสิเขียนเป็นโตหนังสือ ปากกาแท่งสีแดง แล้วเขากะเขียนลงไปเป็นโตหนังสือสีแดงคือกัน
เขาใซ้มือของเขาข้างขวาจับปากกา แล้วกะเขียนอยู่ในกะดาดนั้น
ฮู้บ่ว่าเขาเขียนเป็นโตอี่หยัง หลืออักสนอี่หยัง อันนี้กะบ่ฮู้คือกัน จักว่าเขาเขียนอี่หยัง อาดสิเป็นโตหนังสือ จักว่าเป็นโตหนังสือปะเทดอี่หยัง อันนี้กะบ่ฮู้นำคือกัน

3
นี้คืออี่หยัง นี้คือกันไก กันไกอันบักญาวหนึ่ง
กันไกเป็นเหล็ก ด้ามมันสีดำ อาดสิเป็นพะสะติกกะได้
กันไกเอาไว้เฮ็ดหญัง กันไกเอาไว้ตัด เอาไว้ตัดหลายสิ่งหลายอย่าง เอาไว้ตัดกะดาดกะได้ เอาไว้ตัดเซียกกะได้ ตัดเสี้ยผ้ากะได้ สามาดตัดได้หลายอย่าง
กันไกมันตาย้านบ่ กะตาย้านอยู่ อันตะลายพ้อม กันไกมันตาย้านแล้วกะอันตะลาย เพาะว่ากันไกมันคม มันแหลม มันสามาดปาดได้ หลือเฮ็ดให้เฮามีแผได้คือกัน

4
เขากำลังเฮ็ดหญัง เขากำลังตัดกะดาด
จักพุใดบุ ตอนนี้เขากำลังตัดกะดาดอยู่ เขาใซ้กันไกอันหนึ่ง กำลังตัดกะดาดอยู่ ตัดกะดาดแผ่นสีขาว แผ่นสี่เหลี่ยม ใซ้กันไกตัดลงไปหม้องกางกะดาด อาดสิตัดเป็นลูบสี่เหลี่ยมกะได้ จักเขาสิตัดไปเฮ็ดอี่หยัง
เขาใซ้มือของเขาข้างหนึ่งจับกะดาดอยู่ มือของเขาอีกข้างหนึ่งกำลังจับกันไกอยู่ แล้วกะตัดกะดาดลงไป
เป็นหญังเขาคือตัดกะดาด อันนี้กะบ่ลู้คือกัน จักว่าเขาสิตัดกะดาดเฮ็ดหญัง อาดสิตัดไปใซ้งาน หลือเฮ็ดอี่หยังบางสิ่งบางอย่างกะได้

Basic vocabulary — page 16 — Series B, pictures 15-18: hair, short/long, to wash, to cut

15
นี้คืออี่หยัง นี้คือคน เป็นคนพุซาย เขาเป็นพุซาย
พุซายมีผมสั้น ผมบ่ญาวหลาย มีผมสั้นสีดำ ผมเขากะเป็นสีดำๆ งามๆ อยู่
พุซายคนนี้เขายิ้มบ่ จักคือกันเขาคือสิยิ้ม แต่ว่าบ่ยิ้มหลาย หน้าตาของเขากะบ่สดซื้นปานใด

16
นี้คืออี่หยัง อันนี้กะคือคนคือกันนั้นหละ
อันนี้เป็นพุหญิง บ่แม่นพุซาย เขาเป็นพุหญิง เป็นพุหญิงผมญาว
พุหญิงคนนี้ผมญาวส่ำใด พุหญิงคนนี้กะผมญาวหลายอยู่ ผมญาวคัก ผมญาวหลายเติบ
ผมเขาญาวฮอดบ่าไหล่เอาโลด ผมเขาญาวเลยบ่าไหล่ไปอีก ญาวคัก ญาวแน่ ญาวหลาย
พุหญิงคนนี้เขายืนจั่งใด เขายืนหันข้าง เขาอ่วยข้างไปทางข้าง เขาหันไปทางข้างนั้นหละ
เขาบ่ได้หันหน้าตง เขาบ่ได้อ่วยหน้ามาทางหน้า เขาอ่วยหน้าไปทางข้าง

17
เขากำลังเฮ็ดหญัง เขากำลังสะผมอยู่ หลือสะหัวหละ
พุหญิงคนนี้เขากำลังสะหัวอยู่ เขาอาดสิสะหัวอยู่ในห้องน้ำ หลืออยู่หม้องใดหม้องหนึ่งนี้หละ เขากำลังทำความสะอาดหัว หลืออาบน้ำอยู่
เขาใซ้อี่หยังสะผม เขากะใซ้แซมพู หลือผงสะหัวนั้นหละ เอาไว้ถ้าสะหัว
ขั้นสะหัวแล้ว กะสิเฮ็ดให้หัวสะอาด หลือผมเฮาสะอาดนั้นหละ เฮ็ดให้สดซื้น
สีขาวๆ อยู่เทิงหัวพุหญิงคนนี้เป็นอี่หยัง มันเป็นฟอง ที่เป็นฟองเกิดจากแซมพู หลือเกิดจากผงสะหัวนั้นหละ ขั้นเฮาถูๆๆ อยู่เทิงหัวแล้ว มันกะสิเป็นฟอง หลือเกิดฟองขึ้น
พุหญิงคนนี้เขาสะหัวหลืออาบน้ำอยู่ใส เขาเฮ็ดอยู่ในห้องน้ำ หลืออยู่หม้องใดหม้องหนึ่งนี้หละ อันนี้กะบ่ลู้คือกัน จักว่าเขาอาบน้ำอยู่ใส

18
พุหญิงคนนี้เขากำลังเฮ็ดหญัง เขากำลังตัดผมอยู่
เป็นหญังเขาคือตัดผม ผมเขาอาดสิญาวหลาย หลืออาดสิญาวคักกะได้ เขากะเลยตัดผม เพื่อที่สิให้ผมสั้นๆ หลือกะบ่ให้มันญาวหลาย
เขาใซ้อี่หยังตัดผม เขาใซ้กันไก หลือมีดนั้นหละ เอาไว้ถ้าตัดผม เอาแนวคมๆ ตัดผม เอาอี่หยังตัดกะได้ ที่สามาดตัดเข้า
พุหญิงคนนี้เขาตัดผมอยู่ใส จักคือกัน เขาอาดสิตัดผมอยู่ล้านเสิมสวย หลืออยู่ล้านตัดผมกะได้ จักว่าเขาตัดอยู่ใส หลือสามาดใซ้หมู่ หลือใซ้แม่ ใซ้น้อง ใซ้น้า ใซ้พุใดตัดกะได้ ที่คนนั้นสามาดตัดได้
ขั้นเขาตัดผมแล้วเขาสิงามบ่ อันนี้กะบ่ฮู้คือกัน จักว่าสิงามหลือบ่งาม แล้วแต่คนตัด แล้วแต่ซง เฮาสามาดตัดผมได้หลายซงหลายแบบ ตัดแบบใดงามกะงาม ตัดแบบใดบ่งาม มันกะบ่งาม

Basic vocabulary — page 17 — Series B, pictures 09-12: road, car, pot hole, junction

9
นี้คืออี่หยัง นี้คือหนทาง เป็นหนทางถะหนนค็อนกีด หลือเป็นหนทางถะหนนลาดยางนี้หละ อันนี้กะบ่ฮู้คือกัน
หนทางอันนี้เอาไว้เฮ็ดหญัง เอาไว้ถ้าให้ลดแล่น คนกะสามาดญ่างได้ อันนี้เป็นถะหนน หนทาง เอาไว้ถ้าให้ลดแล่น ลดใหญ่กะได้ ลดจักกะย๊านกะได้ ลดมอเตอไซกะได้ ลดสิบล้อกะได้
อันนี้เป็นหนทาง สามาดแล่นได้ทุกลด ลดอี่หยังกะสามาดแล่นได้
หนทางอันนี้มีปะโยดบ่ กะมีอยู่ มีปะโยดหลาย ลดทุกอย่างสามาดแล่นอยู่เทิงถะหนนหนทางนี้ได้
ขั้นหนทางนี้ดี ลดกะสามาดแล่นง่าย ขั้นหนทางนี้บ่ดี ลดกะแล่นญากขึ้น

10
ลดคันนี้กำลังเฮ็ดหญัง ลดคันนี้กำลังแล่นอยู่
ลดคันนี้กำลังแล่นอยู่เทิงหนทาง แล่นอยู่เทิงหนทางอันนี้หละ
แล้วลดคันนี้สิขับไปใส ลดคันนี้สิแล่นไปใส จักคือกัน อันนี้กะบ่ฮู้คือกัน จักว่าเขาสิแล่นไปใส แต่ว่าลดคันนี้กะแล่นไวเติบ แล่นเล็วคัก ขับเล็วคัก
คือฮู้ว่าลดคันนี้แล่นเล็ว คือฮู้ว่าลดคันนี้ขับเล็ว กะฮู้ เพาะว่าเบิ่งจากล้อ จากความเล็วแล้ว คือสิขับเล็วหลายพุ้นหละ ล้อหมุนบักคักหนึ่ง หมุนเล็วคักขะหนาด แล้วกะลดแล่นไวคัก แล่นไวอี่หลี

11
นี้คืออี่หยัง นี้คือหลุม เป็นหลุมอยู่กางหนทาง หลุมบักใหญ่หนึ่ง ใหญ่บักคัก ใหญ่กะด้อกะเดี้ย ใหญ่อี่หลี
เป็นหญังมันคือมีหลุม อันนี้กะบ่ฮู้คือกัน จักว่าหลุมมันเกิดมาจากอี่หยัง อาดสิลดแล่นเล็ว หลือลดมีความหนัก แล้วกะมาเหยียบหม้องนี้ แล้วเฮ็ดมันเป็นหลุมกะได้
หลุมอันนี้มันตาย้านบ่ กะตาย้านอยู่ เพาะว่าหลุมอันนี้มันอยู่กางหนทาง ขั้นลดขี่มาเล็วๆ แล้วแนมบ่เห็นหลุมอันนี้ แล้วขี่ตกลงไป มันกะสิสะดุด เฮ็ดให้ลดเสียหลัก หลือเกิดอุบะติเหดกะได้
ขั้นฮู้แล้วว่ามันมีหลุม เฮาสิขับลดจั่งใด เฮากะหลบหลุมนี้ หลือขับหลบหลุมอันนี้ออกไป เพื่อที่สิบ่ให้มันตกหลุม
หลุมอันนี้มันลึกบ่ กะสิลึกอยู่ เบิ่งซงแล้วเป็นตาลึกหลาย ลึกบักคักหนึ่ง คือสิลึกอี่หลี

12
นี้คืออี่หยัง นี้คือสามแย้ก
แล้วกะมีลดคันหนึ่ง กำลังจอดอยู่ กำลังหยุดอยู่ หยุดอยู่ตงสามแย้กนั้นหละ หยุดอยู่ตงทางเลี้ยว
เป็นหญังลดคันนี้ต้องหยุด กะต้องหยุด เพาะว่าหยุดเพื่อที่สิเบิ่งลดอยู่ทางตง เพาะว่าเฮามาจากทางแย้ก เฮาสิไปทางตง เฮากะต้องหยุดเบิ่งลดก่อน
ขั้นมีลด เฮากะหยุด ขั้นบ่มีลด เฮากะขับต่อไป
อันนั้นเป็นป้ายอี่หยัง อันนี้เป็นป้ายหยุดลด เพื่อที่เป็นสันญานให้ลดหยุดก่อน ให้หยุดแนมเบิ่งลดดีๆ
ขั้นบ่มีลด เฮากะจั่งขับไป ขั้นมีลด เฮากะต้องหยุดลดก่อน

Basic vocabulary — Page 29 — Series B, pictures 16-18: needle, thread, button, to sew, shirt

16
อันนี้คืออี่หยัง อันนี้เป็นเข็มเนาะ เป็นเข็ม
เข็มหนิกะเอาไว้ถ้าเญ็บ หลือเอาไว้ถ้าส้อมแซมเสี้ยผ้า หลือว่าส้อมแซมอี่หยังต่างๆ ที่เกี่ยวกับเญ็บเนาะ
เข็มหนิกะต้องใซ้คู่กับด้าย ขั้นมีแต่เข็มอย่างเดียว ใซ้งานอี่หยังกะบ่ได้เลย นอกจากว่าขั้นมีด้ายปึ่บ เข็มอันนี้สิสามาดใซ้งานได้ในสิ่งต่างๆ
อย่างเซ้นว่าเสี้ยผ้าเฮาขาด ส้งเฮาขาด เกิบเฮาฮ้าง เกิบเฮาพังเฮาเพ หลือว่าผ้าอี่หยังเฮาขาดเนาะ เฮากะต้องใซ้เข็มหนิไปเญ็บ
ก่อนที่สิเญ็บเฮากะต้องใส่ด้ายก่อน เอาด้ายใส่ ใส่เข้าไปในเข็ม เพื่อที่สิเญ็บส้อมแซมเสี้ยผ้าอี่หยังต่างๆ ที่เฮาฮ้างเฮาเพเนาะ
เข็มนี้มันกะสิเป็นแหลมๆ อยู่หม้องปายมัน ตามลักสะนะ แล้วตงท้าย หลือว่าตงดากมัน หลือว่าตงท้ายๆ มันกะสิมีหู หูน้อยๆ ดอก สำหลับที่สิว่า สิใส่ด้ายเข้าไปในหูนั้น แล้วกะเอาไว้ถ้าเญ็บสิ่งของต่างๆ เนาะ
แล้วกะหม้องปายๆ มัน นั้นแหลมๆ หนะ มันกะสิแหลมเติบเด๊ คมพ้อมเด๊ ขั้นจิ้มเข้าไปใน ขั้นจิ้มเข้าไปในเนี้ยของเฮา หลือว่าผิวของเฮา กะสิเจ็บอยู่หน่อยหนึ่ง เจ็บเติบอยู่ เพาะว่ามันแหลมหลาย แหลมคัก แหลมอี่หลีเนาะ

17
เขากำลังเฮ็ดหญัง กะมีคนคนหนึ่งเนาะ กำลังใส่ด้ายอยู่ เอาด้ายใส่เข็ม
กะสิมีด้ายเส้นหนึ่ง อาดสิแบบว่าเสี้ยเขาขาด ส้งเขาขาด หลือว่าอี่หยังเขาต้องกานปะ หลือว่าแซม หลือว่าส้อมแซมอี่หยังต่างๆ เนาะ เขากะอาดสิเอาด้ายมาปะมาน พอปะมาน ญาวๆ พอปะมาน อาดสิญาวสอกหนึ่ง สอกหนึ่งเด๊ หลือกะอาดสิสั้นกว่านั้นกะได้ แล้วแต่ลักสะนะงาน หลือว่าลักสะนะที่เฮาสิส้อมแซม ว่าสิส้อมหลายส้อมหน้อยเนาะ
เฮากะเบิ่งปะลิมานว่าเฮาต้องใส่ด้ายส่ำใด ญาวส่ำใด ญาวส่ำนั้นส่ำนี้ เฮากะกะปะลิมานเฮาเอง หลือว่าเฮากะต้องคิดว่าเฮาสิเญ็บแบบใด เญ็บหนา เญ็บบ่หนา เญ็บห่าง เญ็บบ่ห่าง เฮากะกะละยะ แล้วกะกะด้ายของเฮาเอง
เขากะเอา พอเตียมด้าย เวลากะเอาด้ายนั้นหละใส่เข้าไปในหูของเข็ม หูอยู่ท้ายเข็มนั้นหละ กะเอาด้ายใส่เข้าไปในหูนั้น
พอใส่แล้วๆ เฮากะเอาปายเข็ม ปายที่มันแหลมๆ หนะ กะเญ็บเข้าไปในเสี้ยผ้าของเฮา ในหม้องที่เฮาสิส้อม เฮากะด้นๆๆ เข้าไปเสียบ เข้าไปในเสี้ยผ้า

18
เขากำลังเฮ็ดหญัง กะมีคนคนหนึ่งหนิหละ เขาอาดสิ กำลังสิส้อมแซมเสี้ยผ้าอยู่
เบิ่งตอนนี้อาดสิแบบว่ากะดุมเสี้ย เขาอาดสิหลุด หลือว่ากะดุมเสี้ย เขาอาดสิ เซียกมันอาดสิขาด เฮ็ดให้กะดุมเม็ดนี้ใซ้งานบ่ได้ หลือว่าบ่สามาดติดกับเสี้ยผ้าได้
เขากะเลยต้องส้อม ต้องแซม ต้องปะ ต้องอันนี้มันเนาะ
เขากะเอาเข็มกับด้ายนั้นหละ เอาด้ายใส่เข้าไปในเข็ม แล้วกะเญ็บ เญ็บกะดุมเม็ดเนี้ย เม็ดที่เขากำลังเฮ็ดอยู่หนิ เญ็บเข้าไปในเสี้ย ในเสี้ยของเขา เพื่อที่ว่าสิให้เสี้ยโตนั้นใซ้งานได้ตามปกกะติ หลือว่าใซ้งานได้คือเก่า

Basic vocabulary — Page 03 — Series B, pictures 12-17: book, book shelf, to take, to open, to read, to close, to put away

12
นี้คืออี่หยัง อันนี้เป็นหนังสือ หนังสือเหล้มบักใหญ่หนึ่ง เหล้มสีเขียว หนาตึ่บเอาโลด
หนังสือมีไว้เฮ็ดหญัง หนังสือกะมีไว้ถ้าอ่าน เอาไว้ถ้าให้ความลู้ ขั้นเฮาเปิดเบิ่งหนังสืออันนั้น หลือว่าเปิดอ่านหนังสืออันนั้น เฮากะสิมีความลู้เกี่ยวกับความลู้ที่มันมีอยู่ในหนังสืออันนั้น
แล้วหนังสือกะมีแนวขั้นหนังสือพ้อม สีแดงๆ นั้นหละ เอาไว้ถ้าขั้นหนังสือ สมมุดว่าเฮาอ่านฮอดหน้านั้นๆ แล้ว เฮากะเอาแนวขั้นหนังสือขั้นไว้ ญามแบบว่าเฮาเซาอ่านแล้ว หลือว่าอ่านฮอดหน้านั้น แล้วเฮาสิพักเบก หลือว่าบ่อยากอ่านอีกแล้ว สิกับมาอ่านมื้อใหม่ เฮากะเอาแนวขั้นหนังสือนั้นมาขั้นไว้ แล้วพอมื้อหลังเฮามาอ่าน เฮากะสิฮู้แล้วว่า เฮาฮอดหม้องนั้นแล้ว เฮาต้องอ่านต่อหม้องนั้น แล้วเฮากะเปิดหม้องที่เฮาขั้นไว้นั้นหละ เอาแนวขั้นสีแดงๆ นั้นหละขั้นไว้ อันนี้กะคือขั้นแนวขั้นหนังสือ

13
เขากำลังเฮ็ดหญัง เขากำลังสิเอาหนังสือ
เอาหนังสืออยู่ใส กะเอาหนังสืออยู่ในซั้นวางหนังสือ
เขาสิเอาหนังสือไปหญัง เขากะอาดสิเอาหนังสือนั้นไปอ่าน เขากะเลยสิเอาหนังสือนั้นไป
หนังสืออยู่เทิงซั้นนั้นมีจักเหล้ม กะมีหลายเหล้มอยู่ มีห้าหกเหล้มพุ้นหนะ เทิงสีซมพู สีเขียว สีแดง สีเหลียง สีฟ้า หลายเหล้มอี่หลีวางเฮียงกันอยู่

14
เขากำลังเฮ็ดหญัง เขากำลังเปิดหนังสือ
เขาเปิดหนังสือเฮ็ดหญัง เขากะอาดสิอ่านหนังสือ เขากะเลยเปิดหนังสือ
เขาเปิดหนังสือจักเหล้ม เปิดเหล้มเดียว เปิดเหล้มเดียวข้อหล้อ เหล้มสีเขียว มือข้างหนึ่งกะเปิดไปอีกฝั่งหนึ่ง มือข้างหนึ่งกะเปิดไปอีกฝั่งหนึ่ง
แล้วอี่หยังอยู่ตงกางหนังสือนั้นสีแดงๆ อันนั้นกะเป็นแนวขั้นหนังสือ เป็นแนวขั้นหนังสือเพื่อที่ว่าสิเอาไว้ถ้าขั้นหนังสือ ขั้นหน้านั้น ขั้นหน้านี้

15
เขากำลังเฮ็ดหญัง เขากำลังอ่านหนังสือ
เขาอ่านหนังสืออยู่กับใผ เขาอ่านหนังสืออยู่พุเดียวของเขานั้นหละ เขาอ่านอยู่พุเดียว
แล้วเขาอ่านหนังสืออยู่ใส เขาอาดสิอ่านอยู่โลงเลียน อาดสิอ่านอยู่บ้าน หลือว่าอาดสิอ่านอยู่ห้องสะหมุดกะได้
เขาอ่านหนังสือจักเหล้ม เขากะอาดสิอ่านหนังสือเหล้มเดียว เพาะว่าเฮาเห็นเขาจับหนังสืออยู่เหล้มเดียว บ่ได้มีหลายเหล้ม

16
เขากำลังเฮ็ดหญัง เขากำลังปิดหนังสือ เขาพุนี้กำลังปิดหนังสือ
เขาปิดหนังสือเฮ็ดหญัง เขากะอาดสิบ่อ่านแล้ว หลือว่าอาดสิเซาอ่านแล้ว เขากะเลยปิดหนังสือไว้ เพื่อที่ว่าอาดสิเอาไปเก็บ หลือว่าเอาไปเมี้ยนหม้องที่เขาเอามา

17
เขากำลังเฮ็ดหญัง เขากำลังเอาหนังสือไปเก็บไว้ซั้นวางหนังสือ
เป็นหญังเขาคือเอาหนังสือไปเก็บไว้ซั้นวางหนังสือ กะเพื่อว่าสิให้มันเป็นเลียบล้อย เป็นละเบียบเลียบล้อย เขากะเลยสิเอาไปเก็บไว้ซั้นวางหนังสือ เพื่อที่ว่าสิให้มันเบิ่งงาม หลือว่าเป็นละเบียบคือเก่า
ขั้นเขาเอาหนังสือออกมาแล้ว บ่ไปเก็บไว้หม้องเก่า คนอื่นที่เขาสิมาเบิ่ง หลือว่าอาดสิเอามาอ่าน เขากะหาเหล้มนั้นบ่พ้อ หาเหล้มนี้บ่พ้อ เพาะว่าคนที่เอาไปอ่านนั้น บ่มาเก็บไว้หม้องเก่า เอาไปอ่านแล้วกะเอาไปถิ้มไว้หม้องอื่น เอาไปวางไว้หม้องอื่น คนอื่นกะบ่สามาดหาเหล้มหนังสือนี้ได้

Basic vocabulary — page 15 — Series B, pictures 11-15: bus, to get on/off, bus station

11
นี้คืออี่หยัง นี้คือลดบั่ด หลือลดเมนั้นหละ เป็นลดโดยสาน
เป็นลดแท็กซี้แม่นบ่ บ่ บ่แม่นลดแท็กซี้ เป็นลดโดยสาน เป็นลดบั่ด หลือลดเมนั้นหละ บ่แม่นลดแท็กซี้
ลดบั่ดเอาไว้เฮ็ดหญัง เอาไว้ถ้าบันทุกคน เอาไว้ถ้าเป็นลดโดยสาน หลือเป็นลดปะจำทาง คนสามาดไปใซ้บอลิกานได้
ลดบั่ดมีล้อบ่ มีอยู่ ลดบั่ดกะมีล้อคือกัน ล้อลดบั่ดเป็นวงกม ลดบั่ดแต่ละคันกะมีหลายล้อ มีสี่ล้อ มีข้างละสองล้อ มีข้างหน้ากับข้างหลัง
ล้อลดบั่ดกะเป็นวงกม ล้อลดบั่ดกะเฮ็ดมาจากยาง เฮ็ดมาจากยางนั้นหละ เพื่อที่สิทนทานกับกานแล่น หลือแล่นไปข้างหน้านั้นหละ
ลดบั่ดมีปะตูบ่ มีอยู่ ลดบั่ดมีปะตูพ้อม มีแต่ปะตูหน้า แล้วลดบั่ดกะมีหน้าต่างพ้อม หน้าต่างเป็นกะจก มีหลายบานเอาโลด
ลดบั่ดคันนี้เอาไว้เฮ็ดหญัง เอาไว้บันทุกพุโดยสาน เป็นลดปะจำทาง พุใดสิไปใสกะสามาดขึ้นลดคันนี้ได้ แล้วลดบั่ดหลือลดปะจำทางคันนี้กะสิแล่นไปส่งพุโดยสาน

12
คนกำลังเฮ็ดหญัง คนหลายคนกำลังสิญ่างขึ้นลดบั่ด ญ่างขึ้นลดปะจำทางคันนี้ เพื่อที่สิไปจุดเป้าหมายข้างหน้า
แล้วมีจักคนยืนต่อคิวกันขึ้นลดคันนี้ กะมีหลายคนอยู่ มีสามสี่คนเอาโลด และมีคนหนึ่งกำลังญ่างขึ้นลดไปแล้ว
ก่อนสิขึ้นลดต้องมีตัวบ่ แล้วแต่คัน แล้วแต่คันลด บางคันกะใซ้ตัว บางคันกะบ่ใซ้ตัว
ขั้นคันใดบ่ใซ้ตัว กะสามาดขึ้นไปได้เลย แล้วไปจ่ายเงินอยู่เทิงลดเอา
บางคันต้องใซ้ตัว ต้องจ่ายเงินก่อนขึ้นลด แล้วจั่งสิสามาดขึ้นลดได้

13
เกิดอี่หยังขึ้น ลดคันนี้กำลังสิไปใส ลดคันนี้กำลังสิออกจากซานซาลา ลดคันนี้กำลังสิแล่นไปข้างหน้า
ตอนนี้เวลาจักโมงแล้ว ตอนนี้เวลาเก้านาลิกาพอดี เก้าโมงตงนั้นหละ
คือฮู้จักเวลา คือฮู้จักเวลาว่าเก้าโมงตง กะเห็นนาลิกา นาลิกามันแขนอยู่นั้นหละ นาลิกามันห้อยอยู่ข้างฝาผะหนัง กะเลยเบิ่งในนาลิกา กะเลยฮู้เวลาว่าจักโมงๆ แล้ว
แล้วลดบั่ดคันนี้สิออกไปใส บ่ลู้คือกัน จักว่าลดบั่ดคันนี้สิออกไปใส แล้วแต่ลด แล้วแต่คัน และแล้วแต่สายคือกัน
ขั้นลดคันนี้สิไปทางนี้ กะฮอดจุดเป้าหมายนี้ ขั้นลดคันนั้นไปทางนั้น กะสิฮอดจุดเป้าหมายอีกเป้าหมายหนึ่ง
ลดแต่ละคันสิไปบ่คือกัน ลดแต่ละคันสิไปคนละหม้อง คนละสาย คนละบ่อน

14
ลดคันนี้สิไปใส ลดบั่ดคันนี้กำลังสิเข้าจอดซานซาลา กำลังสิจอดเลียงคิวกัน เพื่อที่สิมาส่งพุโดยสาน
ตอนนี้ลดบั่ดจอดอยู่ใส จอดอยู่ซานซาลานั้นหละ จอดอยู่หม้องจอดลด จอดอยู่หม้องส่งพุโดยสาน
เป็นหญังคือมาจอดส่งพุโดยสาน เพาะว่ามันฮอดจุดเป้าหมายแล้ว มันฮอดปายทางของมันแล้ว มันต้องส่งพุโดยสาน
เป็นหญังคือเขาจอดซานซาลา เพาะว่ามันฮอดจุดเป้าหมายมันแล้ว ฮอดหม้องฮอดบ่อนลงแล้ว เพื่อที่สิส่งพุโดยสานลงลด เพาะว่ามันฮอดหม้องฮอดบ่อนมันแล้ว
แล้วตอนนี้อยู่ซานซาลามีจักคันแล้ว มีสามคันแล้ว แล้วกำลังมีอีกคันหนึ่งสิเข้ามาจอดซานซาลา แล้วมันกะสิเป็นสี่คัน มีลดสี่คันจอดเฮียงกันเลยบัดหนิ

15
ลดบั่ดคันนี้กำลังเฮ็ดหญัง ลดบั่ดคันนี้กำลังสิจอด กำลังจอดอยู่ซานซาลาอยู่
ลดบั่ดคันนี้จอดเฮ็ดหญัง เพาะว่าฮอดปายทางมันแล้ว ลดบั่ดคันนี้กะเลยสิจอด แล้วกะส่งพุโดยสานลงลด
เป็นหญังเขาคือส่งพุโดยสานลงลด เพาะว่ามันฮอดปายทาง หลือฮอดจุดเป้าหมายมันแล้ว แล้วพุโดยสานกะต้องลงลด เพื่อที่สิไปตามเป้าหมายของเขา ว่าเขาสิไปใสๆ แล้วแต่คน แล้วแต่คนที่สิไป
ตอนนี้มีจักคนแล้ว ตอนนี้ลงลดได้สามคนแล้ว เขากำลังต่อคิวกันลงลดอยู่ มีคนหนึ่งกำลังโผ่หัวออกมา กำลังสิลงจากลดบั่ดคันนี้

Basic vocabulary — Page 33 — Series B, pictures 01-06: room, floor, wall, ceiling, door, window

1
นี้คืออี่หยัง อันนี้เป็นห้อง อาดสิเป็นห้องนอน หลือว่าห้องนั่งเหล้น อันนี้เฮากะบ่ฮู้คือกันเนาะ
ขั้นมีโซฟา หลือว่ามีโทละทัด หลือว่ามีอี่หยัง อาดสิเป็นห้องนั่งเหล้น ขั้นมีที่นอน หลือว่าหม้องนอน กะอาดสิเป็นห้องนอนเนาะ
แต่ในลูบนี้อาดสิเป็นห้องซื่อๆ ห้องที่บ่มีอี่หยัง เป็นห้องสีซมพูเนาะ
ในห้องกะเป็นซงสี่เหลี่ยม มีปะตูพ้อม
มีปะตูสีอี่หยัง ปะตูสีเหลียง
แล้วกะมีพื้น มีเพดาน มีหน้าต่าง เป็นหน้าต่างกะจกเนาะ อันนี้กะเป็นห้องสี่เหลี่ยม

2
นี้คืออี่หยัง อันนี้เป็นพื้นเนาะ พื้นห้อง
ขั้นตงนี้อยู่ในบ้านกะสิเอิ้นว่าพื้นบ้าน ขั้นอยู่ตงดินกะพื้นดิน แต่ว่าอันนี้อยู่ในห้องกะเอิ้นว่าพื้นห้องเนาะ
แล้วพื้นห้องสีอี่หยัง พื้นห้องเป็นสีน้ำตาน
แล้วพื้นห้องหนิมันเลียบบ่ หลือว่าเฮ็ดหยาบกะได้ บ่ พื้น พื้นห้องหนิกะเป็นเลียบๆ เนาะ ตงๆ เลย บ่มีโค้ง บ่มีนูน บ่มีอี่หยังเนาะ ตงๆ เป็นพื้นเลียบ พื้นอยู่ห้องเนาะ เขาเอิ้น

3
นี้คืออี่หยัง อันนี้เป็นฝาผะหนังบ้าน หลือว่าฝาผะหนังเฮียนเนาะ
แต่ว่าลูบนี้มันอยู่ในห้อง กะเอิ้นว่าฝาผะหนังห้องกะได้ ฝาผะหนังในห้องของเฮา เฮากะเอิ้นว่าฝาผะหนังห้อง
แต่ว่าขั้นตอนนี้เฮานั่งอยู่ในบ้าน นั่งอยู่ในเฮียน เฮากะเอิ้นฝาผะหนังบ้าน ฝาผะหนังเฮียนกะได้
ฝาผะหนังห้องนี้เป็นสีซมพูเนาะ เป็นซงสี่เหลี่ยมในห้องนั้นหละ แล้วกะมีอันอื่น มีหน้าต่าง มีกะจก มีปะตูคือกันเนาะ
แล้วฝาผะหนังห้องนี้ เฮาเฮ็ดเป็นสีใดกะได้แม่นบ่ แม่น เฮาสิเฮ็ดสีใดกะได้ สิเฮ็ดสีซมพู สีฟ้า สีเขียวกะได้ แล้วแต่ว่าเฮาอยากสิเฮ็ดเป็นสีใด แล้วแต่ว่าเฮาอยากสิเฮ็ดเป็นแบบใด แล้วแต่ความ เออ แนวมักของเฮา เฮามักอันใด เฮากะเฮ็ดแบบนั้น หลือว่าเฮาสิตกแต่งลวดลายไปจั่งใดกะได้ในฝาผะหนังบ้านฝาผะหนังห้องของเฮา แล้วแต่เฮามัก เฮาเฮ็ดจั่งใด เฮากะเฮ็ดได้เนาะ

4
นี้คืออี่หยัง อันนี้เป็นฝาผะหนัง เออ บ่แม่นฝาผะหนังเนาะ อันนี้เป็นเพดานบ้าน เพดานห้อง เพดานเฮียนเนาะ
ขั้นเฮานั่งอยู่ในเฮียนเนี้ย เฮาสิเอิ้นว่าเพดานบ้านกะได้ เพดานเฮียนกะได้ แต่ว่าเฮาเอิ้นแบบว่า เอิ้นเพดานห้องบ่ได้ เพาะว่าเฮานั่งอยู่ในเฮียน แต่ว่าขั้นเฮานั่งอยู่ในห้อง เฮาสิเอิ้นว่าเพดานห้อง หลือว่าเพดานบ้าน เพดานเฮียนกะได้ เพาะว่าในห้องนั้นมันกะอยู่ในเฮียนอยู่เนาะ

5
นี้คืออี่หยัง อันนี้เป็นปะตู ปะตูห้องเนาะ ปะตูห้องเป็นสี่เหลี่ยม
แล้วปะตูนี้มีไว้เฮ็ดหญัง ปะตูนี้กะมีไว้ปิดไว้เปิด เข้าออก ซื่อๆ นั้นหละ กะเฮ็ดเป็นห้องกั้น แล้วมีฝาผะหนังกั้นแล้ว เฮากะมีปะตูเพื่อว่าสิได้เปิดเข้าเปิดออกได้ง่ายๆ
เป็นหญังคือต้องใส่ปะตู ให้มันสามาดญ่างเข้าญ่างออกได้
ขั้นเฮาบ่ใส่ปะตู ฝาผะหนังหม้องนั้นมันกะสิโล้ง มันกะสิเป็นซ้อง เขาเอิ้นว่ากะสิเป็นป่องโจ่งโป่ง มันกะสิบ่ปิดบ่บังอี่หยังเนาะ กะขั้นมีปะตูแล้วกะสิปอดพัยอีกแบบหนึ่ง คนอื่นหลือว่าคนที่บ่ได้อยู่ในห้องเฮาหนิ กะสิสามาด บ่สามาดเข้าออกๆ ได้จนกว่าเฮาสิเปิดปะตูให้เขาเนาะ
หลือว่าปะตูนี้กะป้องกันโจนกะได้ เฮากะ ขั้นเฮาอยู่ในห้อง แล้วเฮากะล็อกไว้ ขั้นเฮาออกไปข้างนอก เฮากะล็อกไว้ คนอื่นกะสิเข้าห้องเฮาบ่ได้ ขั้นเฮาอยู่ในห้อง เฮากะล็อกไว้ คนอื่นกะเข้ามาบ่ได้คือกันเนาะ

6
นี้คืออี่หยัง อันนี้เป็นหน้าต่าง หน้าต่างห้อง หน้าต่างบ้านเนาะ
แล้วแต่สิเอิ้นว่าหน้าต่างบ้านหลือว่าหน้าต่างเฮียนคือกันกับฝาผะหนังหลือว่าเพดานเนาะ
แล้วหน้าต่างเป็นสีหญัง หน้าต่างมันเป็นสีใสๆ เนาะ เป็นสีขาวๆ ใสๆ มันอาดสิเป็นเฮ็ดมาจากกะจกเนาะ เบิ่งใก้ๆ กะสิเป็นสีฟ้าๆ แต่ว่ามันเป็นสีใสๆ ขาวๆ เนาะ เพาะว่ามันเฮ็ดมาจากกะจก ถืกแสงแดด มันกะสิใสๆ ฟ้าๆ เนาะ
แล้วหน้าต่างหนิมีไว้เฮ็ดหญัง เฮากะมีไว้ถ้าส่องออกไปข้างนอก กะค้ายๆ กับปะตูนั้นหละ กะแต่ว่าหน้าต่างนี้ เฮาสามาดแญง ส่องออกไปข้างนอก หลือว่าแญงออกไปข้างนอกได้ เพื่อที่ว่าสิแนมสิ่งนั้นสิ่งนี้ที่อยู่ข้างนอกบ้าน นอกเฮียนของเฮา หลือว่านอกห้องของเฮาเนาะ