Translations are evolving and should be taken as indicative only! For a guide to the tones and the spelling system used to write this variety of Isaan (Khon Kaen), see the "tone guide" on the overview page.

Tones: M = mid, HR = high-rising, H = high, HF = high-falling, LF = low-falling

Isaan	Pronunciation	Tones	Thai	English/Notes	#occ
ใผ	phai	M	ใคร	1. who {พุซายคนนี้เป็นใผ = Who's this boy?} 2. somebody, someone, anybody, with negative: nobody {บ่มีใผอยู่หนี้จักคนเลย = there's not a single person here}	25/19

Link to overview page
Link to dictionary

Basic vocabulary — Page 23 — Series B, pictures 14-15: brother

14
อันนี้คือพุใด อันนี้กะเป็นคนคือกัน แต่ว่าเป็นพี่ซายหมู่ เป็นพี่ซายใหญ่ หลือว่าเป็นลูกคนกก
ลูกคนกกของพ่อกับแม่ หลือว่าลูกคนที่หนึ่ง ลูกคนที่ออกมาก่อนหมู่
แล้วกะเป็นพุซาย เขากะสิเอิ้นว่า พี่ซาย หลือว่า อ้าย

15
นี้คือพุใด อันนี้เป็นใผ เอิ้นว่าจั่งใด อันนี้กะเป็นน้องซาย
เป็นน้องสุดหมู่ หลือว่าเป็นลูกของพ่อกับแม่ แล้วออกมาทีหลังหมู่ หลือว่าเกิดทีหลังหมู่ เกิดลุ้นหมู่นั้นหละ เขากะสิเอิ้นว่าน้องซาย หลือว่า น้อง
อันนี้กะสิเป็นพุซายคือกัน กะเป็นพุซาย เขาสิเอิ้นว่า น้องซาย หลือว่า น้อง นั้นหละ

BCF06 Expressing thanks (2) — Description

พาบนี้กะสิเฮ็ดให้เฮาฮู้อีกคือเก่าว่า เป็นกานเว้า ขอบคุณ หลือ ขอบใจ

ก่อนที่เฮาสิเว้า ขอบคุณ หลือ ขอบใจ กับใผนั้น คนพุนั้นเขากะอาดสิมาซ่อยเหลียเฮา หลือเฮ็ดอี่หยังให้เฮาบางสิ่งบางอย่าง แล้วเห็นลูบพาบนี้กะสิฮู้ว่า เป็นหญังพุหญิงคนนี้เขาคือขอบคุณพุซายคนนี้ กะเพาะว่าพุหญิงคนนี้ เขากำลังสิเฮ็ดงานบางสิ่งบางอย่าง แต่เขาบ่สามาดเฮ็ดได้ พอพุซายคนนี้เห็น เขากะเลยอยากซ่อย อยากซ่อยเหลีย เพื่อว่าสิซ่อยให้งานของพุหญิงคนนี้เลียบล้อย หลือเส็ดลุล่วงไปด้วยดี พอพุซายคนนี้ซ่อยงานของพุหญิงเส็ดเลียบล้อยแล้ว พุหญิงคนนี้กะบ่มีอี่หยังตอบแทนนอกจากใซ้คำว่า ขอบคุณ

ขั้นพุซายคนนี้อายุส่ำกันกับพุหญิง พุหญิงเขากะอาดสิเว้าว่า

— ขอบคุณหลายๆ เด้อ
— ขอบคุณหลายๆ เด้อจ้า

แต่ว่าขั้นพุซายคนนี้มีอายุน้อยกว่าพุหญิงคนนี้ พุหญิงคนนี้ เขากะอาดสิเว้าว่า

— ขอบใจหลายๆ เด้อ
— ขอบใจหลายๆ เด้อจ้า

แต่ว่ากะสามาดเว้าได้อีกอย่างหนึ่งว่า

— ขอบใจหลายๆ เด้อ ที่มาซ่อย
— ขอบคุณหลายๆ เด้อ ที่มาซ่อย

เฮากะอาดสิสามาดเว้าได้ปะมานนี้เนาะคับ

Basic vocabulary — page 07 — Series B, pictures 18-20: toothbrush, toothpaste, to brush one's teeth

18
นี้คืออี่หยัง นี้คือแปงสีฟัน
แปงสีฟันมีไว้เฮ็ดหญัง แปงสีฟันมีไว้ถ้าทำความสะอาดฟัน
ด้ามแปงสีฟันสีหญัง ด้ามแปงสีฟันสีแดง
ขนแปงสีฟันสีหญัง ขนแปงสีฟันสีขาว
แปงสีฟันอันใหญ่บ่ บ่ แปงสีฟันอันบ่ใหญ่ แปงสีฟันอันน้อยๆ พอดี
แปงสีฟันมีจักอัน แปงสีฟันมีอันเดียว
แปงสีฟันอันหนึ่งใซ้ได้จักคน แปงสีฟันอันหนึ่งใซ้ได้พุเดียว แปงสีฟันมันสิใซ้ของใผใซ้ของมัน บ่สามาดใซ้นำกันได้

19
เขากำลังเฮ็ดหญัง เขากำลังบีบยาสีฟันใส่แปงสีฟัน
ยาสีฟันหลอดใหญ่บ่ บ่ ยาสีฟันหลอดบ่ใหญ่ ยาสีฟันหลอดพอดี
เป็นหญังคือต้องใซ้ยาสีฟัน เพาะว่าขั้นใซ้ยาสีฟัน สิเฮ็ดให้แข้วเฮาสะอาด ขั้นบ่ใซ้ยาสีฟัน แข้วเฮากะสิบ่สะอาด
เขาใซ้อี่หยังบีบยาสีฟัน เขาใซ้มือของเขาบีบยาสีฟันใส่แปงสีฟัน
เขาบีบใส่หลายบ่ บ่ ใส่บ่หลาย ใส่พอดี ใส่พอปะมาน

20
เขากำลังเฮ็ดหญัง เขากำลังแปงฟัน
เขาใซ้อี่หยังแปงฟัน เขาใซ้แปงฟันกับยาสีฟันแปงฟัน
คือลู้ว่าเขาใซ้ยาสีฟัน กะเห็นฟองในปากของเขา กะเลยฮู้ว่าเขาแปงฟันญ้อนยาสีฟัน
เป็นหญังเขากะคือแปงฟัน บ่ลู้คือกัน เขาอาดสิอยากให้แข้วเขาสะอาด เขากะเลยแปงฟันกะได้
เขาแปงฟันอยู่ใส บ่ลู้คือกันว่าเขาแปงฟันอยู่ใส เขาอาดสิแปงฟันอยู่ในห้องน้ำกะได้

Basic vocabulary — Page 03 — Series B, pictures 09-11: shoe, to put on, to take off

9
นี้คืออี่หยัง อันนี้คือเกิบ อันนี้เป็นเกิบ เป็นเกิบโบก
เกิบโบกมีจักกิ่ง เกิบโบกมีสองกิ่ง คู่หนึ่ง เกิบคู่หนึ่งสิมีสองข้างหลือว่าสองกิ่ง
อันนี้กะเป็นเกิบโบก เกิบโบกคู่สีแดง งามคัก งามอี่หลี
แล้วเกิบคู่นี้เป็นเกิบของใผ จักคือกัน จักว่าเกิบคู่นี้เป็นของพุใด จักพุใดมาถอดถิ้มไว้นี้ จักพุใดมาถอดถิ้มวางไว้นี้

10
เขากำลังเฮ็ดหญัง เขากำลังสิใส่เกิบ
มีคนคนหนึ่ง เขากำลังสิใส่เกิบ ฝั่งขวาเขาใส่ได้แล้ว อีกฝั่งซ้ายเขาทันได้ใส่เกิบ เขากำลังสิสุบใส่ลงไป
เขาใส่เกิบจักคู่ ใส่คู่เดียว คนหนึ่งใส่เกิบได้คู่หนึ่ง เพาะว่าคนหนึ่งกะมีสองตีน เกิบคู่หนึ่งกะมีสองข้าง กะใส่ได้สองตีนหลือว่าคนหนึ่งพอดี
ก่อนสิใส่เกิบ เขาคนนี้กะใส่ถุงเท้าพ้อม ถุงเท้าหลือว่าถุงตีนนั้นหละ เขาใส่ถุงเท้าพ้อม ถุงเท้าคู่สีเขียวพุ้นเด่ะ แล้วเขากะสิใส่เกิบ เขาใส่ถุงเท้าแล้วเขากะสิใส่เกิบ

11
เขากำลังสิเฮ็ดหญัง เขากำลังถอดเกิบ คนคนนี้เขากำลังสิถอดเกิบ
เป็นหญังเขาคือถอดเกิบ เขาอาดสิเซาใส่เกิบแล้ว เขากะเลยสิถอดเกิบ
เขาถอดเกิบจักข้าง กะถอดเทิงสองข้าง เพาะว่าเขาบ่ใส่เกิบแล้ว เขากะต้องถอดเกิบ ขั้นสิถอดกะถอดเทิงข้าง เขาบ่ถอดข้างเดียว เพาะว่าเขาต้องถอดออกให้มันเบิด

Basic vocabulary — page 22 — Series B, pictures 11-14: I, you

11
เขากำลังเฮ็ดอี่หยัง เขากำลังสิแนะนำเจ้าของ หลือว่าบอกเจ้าของ ว่าเจ้าของเป็นใผ
เขากะอาดสิเว้าไปว่า นี้คือโตข้อย นี้คือโตเฮา เฮาซื่ออันนี้เด้อ ข้อยซื่ออันนี้เด้อ เฮาเป็นพุนั้นเด้อ เฮาเป็นพุนี้เด้อ อาดสิเว้าปะมานนี้เนาะ

12
พุซายคนนี้เขากำลังเฮ็ดหญัง บ่ฮู้คือกัน เขากำลังซี้มือไปใส่พุหญิง บ่ฮู้คือกันว่าเขาเฮ็ดอี่หยัง
เขาอาดสิถาม หลืออาดสิเว้าอี่หยังบางสิ่งบางอย่างกะได้
อาดสิเว้าไปว่า นี้คือโตเจ้า อันนี้คือเจ้าเด้อ
อาดสิเว้าได้อีกว่า หลือถามได้อีกว่า เจ้าเป็นใผ เจ้าเป็นพุใด เจ้าซื่ออี่หยัง กะอาดสิถามได้ปะมานนี้เนาะ

13
พุหญิงคนนี้กำลังเฮ็ดหญัง พุหญิงคนนี้อาดสิแนะนำโตเจ้าของ หลือว่าบอกซื่อเจ้าของ หลือว่าบอกโตเจ้าของว่าเจ้าของเป็นใผ
เขากะอาดสิเว้าไปว่า นี้คือโตเฮาเด้อ อันนี้โตข้อยเด้อ เฮาซื่ออันนั้นเด้อ เฮาซื่ออันนี้เด้อ กะอาดสิเว้าปะมานนี้เนาะ

14
พุหญิงคนนี้กำลังเฮ็ดหญัง เขากำลังซี้มือไปใส่พุซาย
เขากะอาดสิถาม หลืออาดสิเว้า หลืออาดสิสงสัยอี่หยังบางสิ่งบางอย่าง เขากะเลยถาม
อาดสิถามไปว่า หลืออาดสิเว้าไปว่า อันนี้โตเจ้าแม่นบ่ อันนี้แม่นโตเจ้าบ่ เจ้าซื่ออี่หยัง เจ้าเป็นใผ เจ้ามาแต่ใส กะอาดสิถามปะมานนี้ หลือว่าเว้าได้ปะมานนี้

Basic vocabulary — Page 27 — Series B, pictures 08-10: pond, water, shallow, deep

8
เขากำลังเฮ็ดหญัง มีพุซายพุหนึ่ง เขากำลังยืนอยู่ ถอดเสี้ยผ้าเบิด เหลียแต่ส้งโตเดียวข้อหล้อ
เหลียแต่อี่หยังเกาะ เหลียแต่ส้งโตเดียว เขาใส่ส้งโตเดียว ส้งขาสั้น ส้งสีเหลียงซ้ำแมะ
แล้วเขายืนเฮ็ดหญังอยู่หั้น เขาอาดสิอยากเหล้นน้ำ หลือว่าอยากลงไปในน้ำกะได้

9
เขากำลังเฮ็ดหญัง กะมีพุซายคนหนึ่ง เขากำลังยืนอยู่ในน้ำ
ยืนอยู่ตื้นๆ ดอก บ่ลึกหลาย บ่ได้ลงไปลึก เพียงขาเขาหนิหละ
แล้วเขาลงไปเฮ็ดหญัง จักคือกัน เขาอาดสิอยากเหล้นน้ำ เขากะเลยสิลงไปเหล้นน้ำกะได้

10
เขากำลังเฮ็ดหญัง เขากำลังเหล้นน้ำ
ฮู้ได้จั่งใดว่าเขากำลังเหล้นน้ำ เขากะอยู่ในน้ำ กะเลยฮู้ว่าเขากำลังเหล้นน้ำ
แล้วเขาเหล้นน้ำอยู่กับใผ เขาเหล้นอยู่พุเดียว ตอนนี้เห็นเขาเหล้นอยู่พุเดียว
เขาเป็นพุหญิงหลือเป็นพุซาย เขาเป็นพุซาย กำลังหว้ายน้ำท่วนๆ อยู่
แล้วเขาเหล้นน้ำอยู่ลึกบ่ กะอาดสิลึกอยู่ เพาะว่าเบิ่งแล้ว เพียงเอิกของเขาหลือว่าเพียงบ่าไหล่ของเขาเอาโลด น้ำกะคือสิลึกหลาย เขากะอาดสิลงไปลึกหลายหนั้นหละ
แล้วพุซายคนนี้เขาหว้ายน้ำเป็นบ่ กะอาดสิหว้ายเป็น ขึ้นหว้ายบ่เป็น เขากะบ่ก้าลงไปลึกปานนั้น ขั้นคนหว้ายน้ำบ่เป็น เขากะบ่ก้าลงไปลึกปานนั้น ขั้นเขาหว้ายเป็น เขาจั่งก้าลงไป หลือว่าก้าไปเหล้นน้ำหม้องลึกๆ เนาะ

Basic vocabulary — page 17 — Series B, pictures 06-08: to smile, to be sad, to cry, to be angry

6
เขากำลังเฮ็ดหญัง มีพุหญิงคนหนึ่ง เป็นเด็กน้อยดอก เขากำลังยิ้มอยู่ เขากำลังยิ้ม เขาคือสิดีใจ
เป็นหญังเขาคือยิ้ม บ่ลู้คือกันจักว่าเขายิ้มเฮ็ดหญัง เขาคือสิมีความสุข คือสิมีความสุข เขากะเลยยิ้ม
คือฮู้ว่าเขายิ้ม กะฮู้ว่าเขายิ้ม เพาะว่าเขากำลังดีใจ เบิ่งสีหน้าของเขาแล้ว เขากะดีใจอยู่ เขาอ้าปาก แล้วกะมีฮอยยิ้มอยู่ในหน้าของเขา กะฮู้ว่าเขากำลังดีใจอยู่ หลือว่ามีความสุขอยู่

7
พุหญิงคนนี้เป็นอี่หยัง เขากำลังฮ้องไห้ เสียใจอยู่ กะบ่ฮู้คือกันว่าเขาเป็นหญัง เขากำลังเสียใจ
เบิ่งสีหน้าของเขาแล้ว มีแต่ความเส้า มีแต่ความหมอง บ่มีความสุขอี่หยังเลย
ปากของเขากะฮอยลง บ่เป็นตามีความสุขหลาย เทิงมีน้ำตาแล้ว มาจากตาของเขาพ้อม คิ้วของเขากะตก คือสิบ่มีความสุขคัก คือสิเส้าสิหมองคัก

8
พุหญิงคนนี้เขาเป็นอี่หยัง เขากำลังใจฮ้ายอยู่ เขากำลังโมโห คือสิสูนคัก
คือฮู้ว่าเขาสูน คือฮู้ว่าเขาโมโห กะฮู้เพาะว่าเบิ่งจากสีหน้าของเขาแล้ว
แล้วเขาเฮ็ดหน้าจั่งใด เขากะเฮ็ดหน้าโมโห เป็นตาสูนคัก มีลมออกจากหัวเขาพ้อม ตาเขากะขึงๆ ขึงขังคัก
แล้วแข้วของเขากะกัดแข้วอยู่ คือสิสูนคัก คือสิโมโหคัก คือสิใจฮ้ายคักกะด้อกะเดี้ย
เบิ่งแล้วใจฮ้ายคักอี่หลี จักสิใจฮ้ายใผกะบ่ฮู้คือกัน คือสิโมโหคัก โมโหแน่ ใจฮ้ายคัก ใจฮ้ายแน่

BCF04 Introducing oneself to others — Description

ลูบนี้กะสิเฮ็ดให้เฮาฮู้ว่า เป็นกานแนะนำโตของเจ้าของ ให้คนอื่นฮู้จัก หลือสิเป็นกานทักทายกัน กานแนะนำโตของเจ้าของ ให้แต่ละฝ่ายฮู้จักว่าเจ้าของเป็นใผ มาแต่ใส ซื่ออี่หยัง เฮ็ดงานอี่หยัง เป็นอี่หยัง ปะมานนี้เนาะคับ กะสิญกโตอย่าง อย่างเซ้น เฮาอาดสิเห็นกันอยู่ในงาน เห็นกันอยู่ในห้าง พ้อกันอยู่ในโลงเลียน พ้อกันอยู่โลงพะยาบาน เฮากะอาดจะทักทายกัน แนะนำโตของเจ้าของ ปะมานว่า

— สะหวัดดีคับ ผมซื่อ ... เด้อคับ ผมเป็นพุใหญ่บ้าน บ้าน ... บ้านอันนั้น บ้านอันนี้เด้อคับ ขอฝากเนี้ยฝากโตหนะเด้อคับ

หลือจะเป็นกานแนะนำโตของเจ้าของ เจ้าของอาดจะเป็นนักเลียน แนะนำโตให้คูฮู้จัก อย่างเซ้นว่า

— อาจานคับ สะหวัดดีคับ ผมซื่อนาย ... ผมเลียนอยู่ซั้นมอสี่ทับหก ผมมาเลียนอยู่โลงเลียนแห่งนี้มื้อแลก กะขอฝากเนี้ยฝากโตหนะเด้อคับ

และอีกเหดกาน และอีกสะถานะกานอาดสิพ้อกันอยู่ในงานบางอย่าง อาดสิแนะนำโตของเจ้าของว่า

— สะหวัดดีคับ ผมซื่อ ... เด้อคับ ผมเป็นหมอ ลักสาอยู่โลงพะยาบาน ... เด้อคับ

เฮากะอาดจะแนะนำโตของเจ้าของ หลือคนอื่นกะอาดสิแนะนำโตของเขาให้เฮาฮู้จัก และนี้กะสิเป็นกานแนะนำโตของเจ้าของ ให้คนอื่นฮู้จัก หลือเฮากะอาดสิฮู้จักคนอื่นพ้อม นี้กะเป็นคำเว้าบางส่วน คำเว้าในกานแนะนำโตของเจ้าของของคนอี่สาน

Basic vocabulary — Page 29 — Series B, pictures 08-10: to study, book

8
เขากำลังเฮ็ดหญัง กะมีเด็กน้อยพุซายคนหนึ่งเนาะ อาดสิเป็นเด็กน้อย อันนี้ หลือว่าอาดสิเป็นพุใหญ่แล้ว กะบ่ฮู้จัก กะแนมบ่ค่อยซัดปานใดเนาะ แนมบ่ค่อยเห็น เขากำลังเฮ็ดหญังอยู่ เขากำลังเลียนหนังสืออยู่ นั่งโต่ะอยู่ นั่งเก้าอี้อยู่เนาะ แล้วกะนั่งอยู่โต่ะนั้นหละ นั่งอยู่ข้างหน้าพ้อมเด๊ นั่งกำลังเลียนหนังสืออยู่
เขาเลียนวิชาหญังตอนนี้ อาดสิเป็นคะนิดตะสาดเนาะ อาดสิเป็นคะนิด เลียนคะนิดอยู่ เห็นเขามีโตเลขหลายๆ อาดสิเป็นกานคำนวน กะสิเกี่ยวกับคะนิดตะสาด วิชาคะนิดสาดเนาะ
แล้วเขาเลียนอยู่กับใผ เขากะเลียน อาดสิอยู่กับหมู่ อยู่หลายคน แต่ว่าใน[ที่]เห็นอยู่ตอนนี้คือเขานั่งอยู่โต่ะพุเดียว หมู่อาดสินั่งอยู่[ข้างหลัง] อาดสินั่งอยู่โต่ะข้างหลังเนาะ
มือข้างขวากะจับปากกา กำลังเขียนอยู่สะหมุดหนังสือเขาอยู่เนาะ

9
เขากำลังเฮ็ดหญัง กะมีพุซายพุหนึ่งเนาะ ใส่เสี้ยสีเหลียง กำลังอ่านหนังสืออยู่ อาดสิตั้งใจอ่านหนังสือเพื่อที่สิสอบ หลือว่าอ่านหนังสือเพื่อทบทวนความลู้ หลือว่าให้มันมีความลู้ในสะหมองเนาะ
เขาอ่านหนังสือเกี่ยวกับวิชาหญัง เบิ่งลักสะนะแล้วอาดสิเป็นกานคำนวน วิชาคะนิดตะสาดเนาะ หลือว่าคะนิด หญังที่มันเกี่ยวกับคำนวน หลือว่าฟิสิก หลือว่าอี่หยังกะได้เนาะ

10
แล้วเขากำลังเฮ็ดหญังอยู่ มีพุซายพุหนึ่งเนาะ เขากำลังจับหนังสืออ่านอยู่
เขาอ่านอยู่กับใผ กะจักคือกัน อันนี้เฮากะบ่ฮู้เนาะ เขาอาดสิอยู่พุเดียว หลือว่าอยู่บ้าน หลือว่าอยู่ในห้องเลียนของเขา

Basic vocabulary — Page 24 — Series B, pictures 01-04: police, to stop, car, whistle, to arrest, criminal

1
นี้คือตำหลวด
ตำหลวดเขาเฮ็ดอี่หยัง ตำหลวดกะมีหน้าที่ดูแลปะชาชน เบิ่งแญงปะชาชน ซ่อยเหลียปะชาชน
เป็นอาซีบตำหลวดกะเฮ็ดหลายหน้าที่ กะซ่อยเหลียทุกอย่างเกี่ยวกับซ่อยเหลียปะชาชน
ตำหลวดเขาใส่ซุดสีหญัง ตำหลวดสิใส่ซุดสีกากี หลือว่าสีน้ำตานเข้มๆ

2
เขากำลังเฮ็ดหญัง ตำหลวดเขากำลังเฮ็ดอี่หยัง เขากำลังโบกมือ
เขากำลังโบกมือให้สันญะลักกับคนขับลดว่าให้จอด ว่าให้หยุด ว่าให้จอดอยู่หม้องนี้
ขั้นตำหลวดบอกให้หยุด บอกให้ลดจอด ลดสิจอดบ่ กะจอด ลดคันนั้นกะต้องจอด ขั้นตำหลวดบอกหยุด กะต้องหยุด ขั้นตำหลวดบอกจอด กะต้องจอด

3
เขากำลังเฮ็ดหญัง เขากำลังเป่าลูกหวีด
เขาเป่าลูกหวีดเฮ็ดหญัง เขาอาดสิเป่าให้สันญะลักกะได้ว่าต้องเฮ็ดอี่หยัง ว่าต้องเฮ็ดแบบนั้น ว่าต้องเฮ็ดแบบนี้ เพื่อที่ว่าสิให้คนได้ญินนั้น ได้ฟังเจ้าของ หลือว่าได้ญินเจ้าของนั้นหละ
แล้วคนที่เป่านี้เขาเป็นใผ เขามีหน้าที่เฮ็ดหญัง เขาเป็นตำหลวด พุซายคนนี้เขาเป็นตำหลวด เขาอาดสิมีหน้าที่เบิ่งแญง หลือว่าดูแลอยู่เทิงท้องถะหนนกะได้ เขากะเลยต้องเป่าลูกหวีด

4
ตำหลวดเขากำลังเฮ็ดหญัง ตำหลวดเขากำลังจับพุล้าย เขากำลังจับคนล้าย
คนล้ายเขาเป็นใผ คนล้ายกะเป็นคนคือกัน แต่ว่าเขาอาดสิเฮ็ดผิดกดหมาย หลือว่าเฮ็ดในทางที่บ่ดี เฮ็ดในสิ่งที่บ่ดี เขากะเลยต้องถืกจับ ถืกตำหลวดจับ
แล้วตำหลวดเอาอี่หยังใส่มือพุล้าย กะเป็นกุนแกข้อมือ เอาไว้ถ้าใส่มือพุล้าย หลือว่าเอาไว้ถ้าล็อกมือพุล้ายให้มือเขาติดกัน หลือว่าให้มือเขาอยู่ใก้ๆ กัน เพื่อที่ว่าเขาสิบ่ได้ทำล้ายตำหลวด หลือว่าเพื่อที่ว่าเขาสิบ่ได้ทำล้ายคนอื่นเนาะ

Basic vocabulary — page 15 — Series B, pictures 16-20: family, father, mother, sister, brother

16
นี้คืออี่หยัง นี้คือแผนผังคอบคัว หลือเป็นคอบคัวนั้นหละ
คอบคัวนี้ใหญ่ คอบคัวบักใหญ่หนึ่ง มีสะมาชิกในคอบคัวกะหลายคนเติบอยู่
คอบคัวนี้มีพุใดแน่ กะมีพ่อ แล้วกะมีแม่ แล้วกะมีน้องสาว มีน้องซาย แล้วกะมีพี่สาวพ้อม
คนเป็นพ่อกับแม่นี้ มีลูกเทิงเบิดสามคน เป็นพุหญิงสองคน เป็นพุซายพุหนึ่ง

17
พุซายคนนี้คือพุใด พุซายคนนี้คือพ่อ
เป็นพ่อของลูกเทิงสามคนนี้ เป็นพ่อของลูกของเด็กน้อยเทิงสามคนนี้
คนเป็นพ่อสิเป็นพุซาย หลือเป็นผัวของพุหญิงคนนี้หละ หลือเป็นผัวของคนที่เป็นแม่ของลูกคนนี้

18
พุหญิงคนนี้คือพุใด พุหญิงคนนี้คือเป็นแม่
เป็นเมียของพุซายคนที่เป็นพ่อของคนนี้หละ
พุหญิงคนนี้กะเป็นแม่ของเด็กน้อยสามคนนี้
หลือเป็นเมียของพุซายคนนี้หละ
พุหญิงคนนี้กะเบิ่งแล้วกะงามอยู่ ใส่เสี้ยเกาะอกสีฟ้า ใส่ส้อยพ้อม ผมกะสั้นๆ ผมบ่ญาวหลาย

19
พุหญิงคนนี้เป็นพุใด พุหญิงคนนี้เป็นลูกของพ่อกับแม่นี้
พุหญิงคนนี้เป็นพี่สาวของเด็กน้อยคนนี้พ้อม
พุหญิงคนนี้เป็นพี่สาวใหญ่ หลือเป็นลูกกกนั้นหละ เป็นลูกพุใหญ่สุด
ใส่เสี้ยสีเหลียง ใส่เสี้ยแขนสั้นสีเหลียง
ผมกะค้ายๆ กับแม่ เฮ็ดซงผมคือๆ กันกับแม่นั้นหละ ผมบ่ญาวหลาย ผมบ่สั้นหลาย
คนอี่สานเอิ้นว่า เป็นลูกคนกก หลือเป็นลูกคนต้นหมู่นั้นหละ

20
แล้วพุซายคนนี้เป็นใผ พุซายคนนี้กะเป็นลูกซายของพ่อกับแม่คือกัน
เป็นลูกคนสุดท้อง เป็นลูกปายนั้นหละ เป็นลูกหล้าหมู่ เป็นเด็กน้อยกว่าหมู่ เป็นน้องซายของพุหญิงสองคนนี้พ้อม
เขาใส่เสี้ยสีแดง ใส่เสี้ยแขนสั้นสีแดง
ผมกะสั้นๆ ผมบ่ญาวหลาย เบิ่งแล้วกะเป็นตาฮักอยู่ บ่เป็นตาพุฮ้ายดอก

BCF03 Introducing someone else to others — Description

ลูบนี้สิเป็นกานทักทาย หลือแนะนำโต ของคนที่บ่ฮู้จักกัน คนที่หัวกะเคยพ้อกัน หลือคนที่หัวกะเคยเว้ากัน เว้าง่ายๆ ว่า เป็นคนที่บ่ฮู้จักกันมาก่อน อย่างเซ้น คนใส่เสี้ยสีฟ้าญ่างมากับคนใส่เสี้ยสีแดง สองคนนี้ลู้จักกัน เป็นหมู่กัน ญ่างมาเลี้ยยๆ บ่ลู้ว่าเขาญ่างอยู่ใส อาดจะญ่างอยู่สะหนามกีลา ญ่างอยู่ห้าง แต่ว่าญ่างไปญ่างมา พ้อคนที่ฮู้จักกัน เขาใส่เสี้ยสีเหลียง เขาญ่างมา แล้วคนใส่เสี้ยสีฟ้าแนมเห็น กะสิแนะนำคนใส่เสี้ยสีแดง ให้คนใส่เสี้ยสีเหลียงฮู้จัก กะเลยเว้าขึ้นว่า

— อันนี้หมู่เฮาเด้อ
— อันนี้อาจานเฮาเด้อ
— อันนี้พ่อเฮาเด้อ
— อันนี้คูเฮาเด้อ
— อันนี้หัวหน้างานเฮาเด้อ

เฮาสามาดเว้าว่าอี่หยังกะได้ ขั้นเฮาญ่างมากับใผ ญ่างมากับพุใด เขาเป็นอี่หยัง เฮากะสามาดบอกให้เขา แนะนำให้เขาฮู้จักได้

พอคนใส่เสี้ยสีเหลียงได้ญิน กะต้องทักทาย หลือเว้ากับคนใส่เสี้ยสีแดง เขาอาดจะเว้าขึ้นว่า

— สะหวัดดีคับ ข้อยซื่ออันนี้เด้อ ข้อยซื่ออันนั้นเด้อ

เฮาซื่อหญัง เฮากะตอบไปว่าเฮาซื่อหญัง เฮากะบอกเขาไปว่า เฮาซื่ออี่หยัง พอคนเสี้ยสีแดงได้ญินแล้ว เขากะต้องเว้าขึ้นอีกว่า

— สะหวัดดีคับ ผมซื่อ ผมซื่ออันนั้นเด้อ ผมซื่ออันนี้เด้อ ผมเป็นอันนั้น ผมเป็นอันนี้ ผมเป็นคู ผมเป็นอาจาน ผมเป็นตำหลวด

เฮากะเว้าไปได้ เฮาเป็นอี่หยัง เฮากะเว้าทักทายกันไป แล้วกะอาดสิถาม

— ซำบายดี มีสุขบ่
— สิไปใส มาใส

ปะมานนี้เนาะคับ พอเว้ากันโดน หลือหลายความแล้ว กะสิเว้าอีกว่า

— ยินดีที่ได้ฮู้จักเด้อคับ
— ยินดีที่ได้ฮู้จักเด้อค้า

อาดสิเว้ากันปะมานนี้เนาะคับ

Basic vocabulary — Page 02 — Series B, pictures 16-20: TV, remote control, to switch on/off, to watch TV

16
นี้คืออี่หยัง อันนี้คือโทละทัด อันนี้เป็นโทละทัด โทละทัดจอแบน โทละทัดเคี่ยงบักใหญ่หนึ่ง ใหญ่กะด้อกะเดี้ย
ปะโยดของโทละทัดกะมีหลายสิ่งหลายอย่างอยู่ เอาไว้ถ้าเบิ่งข่าว ไว้ถ้าเบิ่งกาตูน ไว้ถ้าเบิ่งอันนั้นอันนี้ได้หลายสิ่งหลายอย่าง
โทละทัดมันลาคาแพงบ่ กะแพงอยู่ แพงหลาย แพงคัก ขั้นบ่มีเงินกะซื้อบ่ได้ เพาะว่ามันแพงหลาย

17
นี้คืออี่หยัง อันนี้เป็นลีโหมด อาดสิเป็นลีโหมดโทละทัดกะได้
ลีโหมดเป็นแบบใด ลีโหมดกะเป็นสี่เหลี่ยม อันน้อยๆ เอาไว้ถ้ากด กดเกี่ยวกับโทละทัด หลือว่าใซ้งานคู่กับโทละทัด
ลีโหมดกะอาดสิเอาไว้ถ้าเลี้ยนซ้อง หลือว่ากดไปซ้องนั้นซ้องนี้ หลือว่าเพิ้มเสียงลดเสียง หลือว่าใซ้ไว้ตั้งค้าอันนั้นอันนี้กะได้

18
เขากำลังเฮ็ดหญัง เขากำลังเปิดโทละทัด เขาใซ้มือของเขากดลีโหมด เพื่อว่าเปิดโทละทัด เขาอาดสิอยากเบิ่งโทละทัด เขาเลยสิเปิดโทละทัดนี้
แล้วเขาอยู่ไกโทละทัดบ่ เขาใซ้ลีโหมดกดเปิดโทละทัดอยู่ไกโทละทัดคักบ่ บ่ บ่ไกหลาย ขั้นลีโหมดกับโทละทัดอยู่ไกกันหลาย สันญานมันกะสิบ่ฮอดกัน กะสิบ่เซี้ยมต่อกัน เพาะสะนั้นแล้ว ลีโหมดกับโทละทัดกะสิอยู่ใก้ๆ กัน

19
เขากำลังเฮ็ดหญัง เขากำลังเบิ่งโทละทัด
พุซายคนนี้เขากำลังเบิ่งโทละทัด กำลังจ้องเบิ่งโทละทัด กำลังแนมเบิ่งโทละทัด
เขาอยู่กับใผ เขาอยู่พุเดียว เขาเบิ่งของเขาพุเดียวข้อหล้อ บ่มีฮอดหมู่ อยู่พุเดียวอ้อยต้อย

20
เขากำลังเฮ็ดหญัง เขากำลังปิดโทละทัด
เขาปิดโทละทัดเฮ็ดหญัง เขาอาดสิบ่เบิ่งโทละทัดนี้แล้ว เขากะเลยปิดโทละทัดกะได้
เขาปิดโทละทัดจั่งใด เขาใซ้ลีโหมด หลือว่าใซ้มือของเขากดลีโหมด เพื่อว่าสิปิดโทละทัด
เป็นหญังเขาต้องปิดโทละทัดญ้อนลีโหมด เพาะว่าลีโหมดหนะมันมีปุ่มกดปิดโทละทัด หลือว่าปุ่มกดเปิดโทละทัด
แต่ว่าขั้นเฮาบ่อยากกดลีโหมดนี้ เฮากะไปปิดอยู่หม้องโทละทัดกะได้ อยู่โทละทัดมันกะสิมีปุ่มเปิดหลือว่าปุ่มปิดโทละทัดอยู่ เฮากะสามาดไปปิดหลือไปเปิดอยู่หม้องโทละทัดกะได้ แต่ว่าขั้นเฮาบ่อยากญ่างไปโทละทัด เฮากะจับลีโหมดนี้ แล้วกะปิดหลือว่าเปิดโทละทัดกะได้

Basic vocabulary — page 20 — Series B, pictures 16-20: school, student, teacher, to pay respect

16
นี้คืออี่หยัง อันนี้เป็นโลงเลียน เบิ่งซงแล้วเป็นลักสะนะของโลงเลียน
แล้วเด็กน้อยมาเฮ็ดอี่หยังอยู่โลงเลียน เด็กน้อยนักเลียนมาเฮ็ดอี่หยังอยู่โลงเลียน กะมาเลียนหนังสือ
โลงเลียนเป็นหม้องให้ความฮู้ ขั้นเด็กน้อยมาโลงเลียน กะสิได้ความฮู้ ขั้นบ่มาโลงเลียน กะสิบ่ได้ความฮู้ กะสิปึก
โลงเลียนนี้มีจักซั้น โลงเลียนนี้มีสองซั้น มีซั้นหนึ่งกับซั้นสอง
เสาอยู่ข้างหน้าโลงเลียนนั้นเป็นเสาอี่หยัง เป็นเสาทงซาด ทุกโลงเลียนในปะเทดไทยสิมีเสาทงซาด เป็นเสาเคาลบทงซาดอยู่หน้าโลงเลียน แล้วกะมีทงซาดอยู่เทิงหลักเสานั้นพ้อม
เสาอันนี้กับทงซาดอันนี้เอาไว้เฮ็ดหญัง เอาไว้ยืนเคาลบทงซาด ทุกมื้อเวลาสองโมงเซ้าที่นักเลียนไปโลงเลียน เด็กน้อยต้องมายืนเคาลบทงซาดอยู่หนี้ แล้วกะล้องเพงซาดของปะเทดไทย

17
นี้คือพุใด เขาเป็นพุใด เขาเป็นใผ เขาเป็นเด็กน้อยนักเลียน เป็นนักเลียน
เขาใส่ซุดนักเลียนอยู่ ตอนนี้เขากำลังแต่งซุดนักเลียนอยู่
แล้วเขาถืออี่หยังอยู่ เขาถือกะเปา เป็นกะเปาถือ เป็นกะเปาถือของนักเลียน

18
นี้คือพุใด อันนี้เป็นเด็กน้อยนักเลียน เป็นเด็กน้อยนักเลียนพุหญิง
เขาใส่ซุดอี่หยังอยู่ เขาใส่ซุดนักเลียน พุหญิงสิใส่ซุดนักเลียน แล้วกะใส่สิ้นพ้อม เป็นสิ้นกะโปงนักเลียน
แล้วในมือของเขานั้นถืออี่หยังอยู่ ถือกะเปานักเลียน เป็นกะเปานักเลียน เขากำลังถืออยู่

19
นี้คือพุใด อันนี้เป็นคู เป็นอาจาน
คูมีหน้าที่เฮ็ดหญัง คูมีหน้าที่สอน สอนหนังสือเด็กน้อยนักเลียน ให้นักเลียนมีความฮู้ ให้เด็กน้อยเลียนหนังสือเก่งๆ แล้วกะซ่อยบอกซ่อยสอนเด็กน้อยนักเลียน ให้เป็นคนดี แล้วกะตั้งใจเลียน
เห็นดำๆ อยู่ข้างหลังอาจานนั้นเป็นอี่หยัง เป็นกะดานดำ เอาไว้เขียน หลือเอาไว้สอนนักเลียน
สีขาวๆ ที่เขียนอยู่นั้นคืออี่หยัง เป็นซ่อก เอาไว้เขียนลงไปในกะดานดำนั้น ให้มันเกิดโตหนังสือ หลือให้เกิดสิ่งที่เฮาสิสอนลงไปในนั้น

20
เด็กน้อยนักเลียนกำลังเฮ็ดอี่หยัง กำลังไหว้อาจาน กำลังทำความเคาลบอาจาน
เขาเฮ็ดเฮ็ดหญัง เขาไหว้อาจานเฮ็ดหญัง เขากะไหว้เพื่อที่สิทำความเคาลบอาจาน
เด็กน้อยนักเลียนทุกคนที่อยู่ในโลงเลียนนั้น ขั้นพ้ออาจานคนใด ต้องไหว้ หลือสะหวัดดีอาจาน เพื่อทำความเคาลบ

Basic vocabulary — Page 30 — Series B, pictures 18-20: to wash one’s face, to brush one’s teeth, to comb one’s hair

18
เขากำลังเฮ็ดหญัง กะมีพุหญิงเนาะ เป็นพุหญิงดอก มัดผมจุกพ้อมเด่ะ ฝั่งซ้ายกะฝั่งขวา มัดเทิงสองข้างเนาะ เขากำลังล้างหน้าอยู่
อาดสิล้างอยู่ห้องน้ำ อาดสิล้างอยู่ในบ้านเขาหละ อาดสิเป็นห้องน้ำบ้านเขาหละ กำลังล้างหน้าอยู่
กะใซ้มือสองข้างหนะ จับหน้าขึ้นมา แล้วกะ เออ จับน้ำขึ้นมาเนาะ แล้วกะล้างๆๆ หน้าของเขา
เป็นหญังเขาคือล้างหน้า เขาอาดสิหัวกะตื่น หัวกะตื่นนอน แล้วกะล้างหน้า เพื่อสิเฮ็ดให้มันสดซื้น เพื่อที่สิเฮ็ดให้หน้ามันสดซื้นเนาะ แล้วกะบ่ให้มีอี่หยังติดหน้า หลือว่าไขมัน หลือว่าเหงี่ยอี่หยังติดหน้า เฮากะสิล้างเอาความสกกะปกออกไปเนาะ

19
พุหญิงคนนี้กำลังเฮ็ดหญัง กะมีพุหญิงพุหนึ่งเนาะ พุหญิงคนนี้หละกำลังแปงฟัน
กำลังแปงฟันใซ้แปงสีฟัน ใซ้ยาสีฟัน แล้วกะแปงๆๆๆ แปงแข้วของเขาเนาะ
แล้วเขาแปงอยู่ใส กะอาดสิแปงในห้องน้ำบ้านของเขาเนาะ ตอนนี้เขากำลังอยู่หน้า อาดสิเป็นหน้ากะจก หลือว่าอยู่หน้าชักโคก อุ้ย บ่แม่น อยู่หน้าอ่างล้างหน้าเนาะ บ่แม่นหน้าชักโคกเนาะ เขากำลังแปงฟันอยู่
แล้วเขาแปงฟันเฮ็ดหญัง เขากะแปงฟันเพื่อที่ว่าสิให้แข้ว หลือว่าปากของเขาสะอาดเนาะ คนตื่นนอนมาใหม่ๆ กิ่นปากมันกะสิมีอยู่ เพื่อที่ว่าสิทำความสะอาดแข้ว หลือว่าทำความสะอาดปากของเฮา บ่ให้มันมีกิ่นเหม็นอยู่ในแข้ว ซอกแข้วของเฮา เฮากะต้องแปงฟัน แปงแข้ว เพื่อที่สิให้แข้วเฮาสะอาด หลือว่าบ่มีกิ่นเหม็นหลายปานใดเนาะ

20
เขากำลังเฮ็ดหญัง กะมีพุหญิงพุหนึ่งเนาะ กำลังหวีผม
กำลังหวีผมอยู่ กะใซ้มือข้างหนึ่งจับหวี แล้วกะมือข้างหนึ่งจับผม แล้วกะหวีๆๆๆ หวีลงไป
แล้วเป็นหญังเขาคือหวีผม กะบ่ฮู้คือกัน ผมเขาอาดสิหญุ้ง หลือว่าผมเขาอาดสิหญอง มันข้องกันจั่งซี้เนาะ เขากะต้องใซ้หวี หวีผมลงไป ให้มันเป็นเส้นของใผของมัน บ่ให้มันไปหญุ้งกัน หลือว่าไปข้องกันเนาะ
แล้วผมของเขาญาวบ่ กะญาวเด่ะ เบิ่งลักสะนะแล้วญาวเติบ ญาวคักอยู่ ญาว บักญาวหนึ่ง เลยบ่าไปอีก ฮอดนมฮอดเอิกพุ้นหนะ ผมของเขากะเลยญาวคักญาวแน่ ไว้จั่งใดญาวแท้ ผมนั้นกะเดย

Basic vocabulary — page 16 — Series B, pictures 11-14: to swim, fish, duck, turtle

11
นี้คืออี่หยัง นี้คือปา ปาอยู่ในน้ำ ปาโตบักใหญ่หนึ่ง
ปามันกำลังเฮ็ดหญังอยู่ ปามันกำลังหว้ายน้ำอยู่ มันกำลังหว้ายน้ำอยู่ในน้ำ มันกำลังหว้ายไปข้างหน้าอยู่
อะวัยยะวะของปามีอี่หยังแน่ มีส่วนใดแน่อยู่ในโตล้างกายของปา กะสิมีคีบพ้อม มีเหงียกพ้อม มีปากพ้อม แล้วกะมีตา มีหาง แล้วกะมีลำโต บางโตกะมีเก็ดพ้อม บางโตกะบ่มีเก็ด
ปามันใซ้ซีวิดอยู่ใส ปามันใซ้ซีวิดอยู่ในน้ำแม่นบ่ แม่น ปามันใซ้ซีวิดอยู่ในน้ำ ขั้นมันอยู่เทิงบกมันกะสิตาย ขั้นมันอยู่ในน้ำมันจั่งสิมีซีวิด หลือมีซีวิดลอดนั้นหละ

12
เขากำลังเฮ็ดหญัง เขากำลังหว้ายน้ำอยู่ พุซายคนนี้เขากำลังหว้ายน้ำอยู่ เขาหว้ายน้ำอยู่ในน้ำ
จักเขาหว้ายอยู่ใส อาดสิหว้ายอยู่ในทะเล หลือหว้ายอยู่สะหว้ายน้ำกะได้
เขาหว้ายอยู่กับใผ พุซายคนนี้เขาหว้ายน้ำอยู่กับใผ เขาหว้ายพุเดียว เขาอยู่พุเดียวของเขา คือสิบ่มีหมู่ เขากะเลยหว้ายน้ำอยู่พุเดียว

13
นี้คืออี่หยัง นี้คือเป็ด
เป็ดมันกำลังเฮ็ดหญังอยู่ มันกำลังลอยน้ำอยู่ มันกำลังลอยน้ำอยู่ในน้ำ จักมันลอยน้ำอยู่สะใด ฮู้แต่ว่ามันกำลังลอยน้ำอยู่ในน้ำอยู่
เป็ดมันเป็นโตจั่งใด เป็ดมันโตค้ายๆ กับนก หลือค้ายๆ กับไก่นั้นหละ
ปากเป็ดมันกะสิเป็นเปๆ เป็นใหญ่ๆ ปากเป็ดมันเป็นสีส้ม บ่เป็นสีดำคือไก่
เป็ดบ่สามาดบินได้คือนก เป็ดสามาดบินได้หน่อยเดียว บินได้บ่สูงหลาย บินได้ต่ำ บินบ่ได้สูงคือนก

14
นี้คืออี่หยัง นี้คือเต่า
เต่ามันกำลังเฮ็ดหญังอยู่ เต่ามันกำลังหว้ายน้ำอยู่ มันกำลังหว้ายน้ำอยู่ในน้ำ มันหว้ายอยู่โตเดียวนั้นหละ มันใซ้ขาของมัน กำลังหว้ายน้ำอยู่ในน้ำอยู่
มันหว้ายน้ำอยู่ใส จักคือกัน จักว่ามันหว้ายน้ำอยู่ใส ฮู้แต่ว่ามันหว้ายอยู่ในน้ำนั้นหละ
มันหว้ายอยู่ใต้น้ำ หว้ายอยู่ใต้ๆ น้ำ หว้ายอยู่ลึกๆ เผี้ย บ่ได้หว้ายอยู่สูงหลาย
อะวัยยะวะของเต่าสิมีอี่หยังแน่ มันกะสิมีขาพ้อม มีสี่ขา เต่ากะสิมีหางพ้อม แล้วกะมีหัวพ้อม มีปาก มีตา คือๆ กันกับนก กับหญังนั้นหละ แต่ว่าเต่ามันสิแตกต่างจากโตอื่น เพาะว่ามันสิมีกะดองพ้อม มีกะดองอยู่เทิงหลังของมัน เอาไว้ถ้าหลบซ้อน หลือเสี่ยงโตของมัน เสี่ยงหัว เสี่ยงขาของมัน
ญามเกิดเหดล้ายใดๆ มันสิเข้าไปหลบซ้อน ไปเสี่ยงโตอยู่ในกะดองของมัน
เต่ามันเป็นสัดเคิ่งบกเคิ่งน้ำ มันสามาดอยู่ในน้ำกะได้ สามาดอยู่เทิงบกกะได้ มันบ่คือปา มันสามาดใซ้ซีวิดอยู่ในน้ำกะได้ ใซ้ซีวิดอยู่เทิงบกคือกันกับสัดโตอื่นกะได้

Basic vocabulary — Page 27 — Series B, pictures 04-07: moustache, beard, to shave, razor, razor blade

4
นี้คือพุใด จักคือกัน บ่ฮู้ว่าเขาเป็นใผ ฮู้แต่ว่าเขาเป็นพุซาย
หน้าตาเขาเป็นจั่งใด หน้าตาเขามีหนวด มีหนวดพ้อม หนวดสีดำๆ
หนวดคืออี่หยัง หนวดกะเป็นหนวดที่มันเกิดเป็นขนอยู่ใต้ดัง หลือว่าอยู่เทิงปาก
หนวดนี้มันเส้นญาวบ่ แล้วแต่ แล้วแต่หนวดของคน บางคนกะหนวดญาว บางคนกะหนวดสั้น แล้วแต่เขาสิจ่ง แล้วแต่เขาสิไว้
แล้วคนคนนี้ ผมกับหนวดของเขา อี่หยังญาวกว่ากัน กะผมเลยเนาะ ผมของเขาญาวกว่าหนวด หนวดของเขาสั้นๆ หนึ่ง หนวดของเขาบ่ญาวหลาย ญาวพอดี ญาวหน่อยเดียว

5
เขามีหน้าตาเป็นจั่งใด หน้าตาของเขามีหนวดพ้อม เทิงหนวดเทิงเคา ผมกะญาว เฮ็ดปึ่กซึกอยู่
หนวดกับเคาหนิคือกันบ่ กะค้ายๆ กัน หนวดกะคือสิเกิดอยู่เทิงปาก หลือว่าอยู่ใต้ดัง หม้องนั้นหละ แล้วกะสิเกิดอยู่ใต้ปากหน่อยหนึ่ง
แล้วเคาเด๊ เกิดอยู่ใส เคานั้นกะสิเกิดอยู่ใต้คาง เขากะสิเอิ้นว่าเคา เพาะสะนั้นแล้วหนวดกับเคาสิเกิดอยู่คนละหม้อง เกิดอยู่คนละบ่อน
ผมกับหนวดหนิคือกันบ่ บ่ ผมกะสิเกิดอยู่เทิงหัว หลือว่าเกิดอยู่หัวของเฮา หนวดกับเคากะสิเกิดอยู่หม้องที่เอ่ยไปหลือว่าเว้าไปหนั้นหละ
แล้วคนเฮานี้สิมักไว้หนวดไว้เคาบ่ กะแล้วแต่ แล้วแต่คนมัก พุใดมักกะจ่งหลือว่าเอาไว้ พุใดบ่มักกะโกนออกหลือว่าบ่จ่งไว้หนั้นหละ

6
นี้คืออี่หยัง อันนี้คือแนวโกนหนวด แล้วกะมีดโกนหนวดพ้อม
แนวโกนหนวดเอาไว้เฮ็ดหญัง กะเอาไว้ถ้าโกนหนวดหนั้นหละ เอาไว้ถ้าตัดหนวดหลือว่าโกนหนวดออกจากปากหลือว่าจากคางของเฮา เพื่อสิให้มันเกี้ยงเกา หลือว่าบ่ให้มันมีหนวดญาวหนั้นหละ
แนวโกนหนวดเป็นจั่งใด แนวโกนหนวดหนั้นกะสิเป็นสีขาวๆ เป็นฟองขาวๆ เอาไว้ถ้าบีบใส่เส้นหนวดของเฮา หลือว่าเส้น เส้นขนของเฮา เพื่อที่เฮาสิโกนออก กะใซ้มีดโกนที่มันคมๆ กะมาโกนออกๆ เพื่อที่สิตัดขนนั้นออก บ่ให้มันมีขนอยู่หน้าของเฮา
มีดโกนหนิกะเฮ็ดจากอี่หยัง กะเฮ็ดจากมีด เพาะว่ามันต้องคม มันต้องมีคมคัก แล้วมันกะต้องสามาดตัดขนได้พ้อม มันจั่งสิเป็นมีดโกนหนวด

7
เขากำลังเฮ็ดหญังอยู่ พุซายพุหนึ่ง เขากำลังโกนหนวดอยู่
เขาโกนหนวดจั่งใด เขากะใซ้แนวโกนหนวดแล้วกะมีดโกนหนวดกำลังโกนหนวดของเขา
เขาเอาแนวโกนหนวดบีบใส่ใส กะบีบใส่หม้องคาง หลือว่าใส่ปากของเขา หลือว่าใส่หม้องหนวดที่เขามี หลือว่าหม้องที่หนวดมันเกิด
เป็นหญังเขาต้องบีบใส่หม้องหั้น กะญ้อนว่าเขาอยากโกน เขากะเลยบีบใส่หม้องหั้น
อยากโกนหม้องใด อยากโกนหนวดหม้องใดออก กะบีบใส่หม้องหนั้น หม้องใดบ่อยากโกน กะบ่ต้องบีบใส่
บีบใส่แล้วเฮ็ดจั่งใดต่อไป บีบใส่แล้วๆ กะบีบใส่พอปะมาน หลือว่าให้มันพอดีกับหนวดของเฮา แล้วเฮากะใซ้มีดโกนๆๆ ออก หลือว่าตัดๆๆ ออก แล้วหนวดของเฮากะสิบ่มี หลือว่าหนวดของเฮากะสิหายไป สิเฮ็ดให้หน้าเฮาเกี้ยงเกา หลือว่าบ่มีหนวดเลย

Basic vocabulary — Page 03 — Series B, pictures 12-17: book, book shelf, to take, to open, to read, to close, to put away

12
นี้คืออี่หยัง อันนี้เป็นหนังสือ หนังสือเหล้มบักใหญ่หนึ่ง เหล้มสีเขียว หนาตึ่บเอาโลด
หนังสือมีไว้เฮ็ดหญัง หนังสือกะมีไว้ถ้าอ่าน เอาไว้ถ้าให้ความลู้ ขั้นเฮาเปิดเบิ่งหนังสืออันนั้น หลือว่าเปิดอ่านหนังสืออันนั้น เฮากะสิมีความลู้เกี่ยวกับความลู้ที่มันมีอยู่ในหนังสืออันนั้น
แล้วหนังสือกะมีแนวขั้นหนังสือพ้อม สีแดงๆ นั้นหละ เอาไว้ถ้าขั้นหนังสือ สมมุดว่าเฮาอ่านฮอดหน้านั้นๆ แล้ว เฮากะเอาแนวขั้นหนังสือขั้นไว้ ญามแบบว่าเฮาเซาอ่านแล้ว หลือว่าอ่านฮอดหน้านั้น แล้วเฮาสิพักเบก หลือว่าบ่อยากอ่านอีกแล้ว สิกับมาอ่านมื้อใหม่ เฮากะเอาแนวขั้นหนังสือนั้นมาขั้นไว้ แล้วพอมื้อหลังเฮามาอ่าน เฮากะสิฮู้แล้วว่า เฮาฮอดหม้องนั้นแล้ว เฮาต้องอ่านต่อหม้องนั้น แล้วเฮากะเปิดหม้องที่เฮาขั้นไว้นั้นหละ เอาแนวขั้นสีแดงๆ นั้นหละขั้นไว้ อันนี้กะคือขั้นแนวขั้นหนังสือ

13
เขากำลังเฮ็ดหญัง เขากำลังสิเอาหนังสือ
เอาหนังสืออยู่ใส กะเอาหนังสืออยู่ในซั้นวางหนังสือ
เขาสิเอาหนังสือไปหญัง เขากะอาดสิเอาหนังสือนั้นไปอ่าน เขากะเลยสิเอาหนังสือนั้นไป
หนังสืออยู่เทิงซั้นนั้นมีจักเหล้ม กะมีหลายเหล้มอยู่ มีห้าหกเหล้มพุ้นหนะ เทิงสีซมพู สีเขียว สีแดง สีเหลียง สีฟ้า หลายเหล้มอี่หลีวางเฮียงกันอยู่

14
เขากำลังเฮ็ดหญัง เขากำลังเปิดหนังสือ
เขาเปิดหนังสือเฮ็ดหญัง เขากะอาดสิอ่านหนังสือ เขากะเลยเปิดหนังสือ
เขาเปิดหนังสือจักเหล้ม เปิดเหล้มเดียว เปิดเหล้มเดียวข้อหล้อ เหล้มสีเขียว มือข้างหนึ่งกะเปิดไปอีกฝั่งหนึ่ง มือข้างหนึ่งกะเปิดไปอีกฝั่งหนึ่ง
แล้วอี่หยังอยู่ตงกางหนังสือนั้นสีแดงๆ อันนั้นกะเป็นแนวขั้นหนังสือ เป็นแนวขั้นหนังสือเพื่อที่ว่าสิเอาไว้ถ้าขั้นหนังสือ ขั้นหน้านั้น ขั้นหน้านี้

15
เขากำลังเฮ็ดหญัง เขากำลังอ่านหนังสือ
เขาอ่านหนังสืออยู่กับใผ เขาอ่านหนังสืออยู่พุเดียวของเขานั้นหละ เขาอ่านอยู่พุเดียว
แล้วเขาอ่านหนังสืออยู่ใส เขาอาดสิอ่านอยู่โลงเลียน อาดสิอ่านอยู่บ้าน หลือว่าอาดสิอ่านอยู่ห้องสะหมุดกะได้
เขาอ่านหนังสือจักเหล้ม เขากะอาดสิอ่านหนังสือเหล้มเดียว เพาะว่าเฮาเห็นเขาจับหนังสืออยู่เหล้มเดียว บ่ได้มีหลายเหล้ม

16
เขากำลังเฮ็ดหญัง เขากำลังปิดหนังสือ เขาพุนี้กำลังปิดหนังสือ
เขาปิดหนังสือเฮ็ดหญัง เขากะอาดสิบ่อ่านแล้ว หลือว่าอาดสิเซาอ่านแล้ว เขากะเลยปิดหนังสือไว้ เพื่อที่ว่าอาดสิเอาไปเก็บ หลือว่าเอาไปเมี้ยนหม้องที่เขาเอามา

17
เขากำลังเฮ็ดหญัง เขากำลังเอาหนังสือไปเก็บไว้ซั้นวางหนังสือ
เป็นหญังเขาคือเอาหนังสือไปเก็บไว้ซั้นวางหนังสือ กะเพื่อว่าสิให้มันเป็นเลียบล้อย เป็นละเบียบเลียบล้อย เขากะเลยสิเอาไปเก็บไว้ซั้นวางหนังสือ เพื่อที่ว่าสิให้มันเบิ่งงาม หลือว่าเป็นละเบียบคือเก่า
ขั้นเขาเอาหนังสือออกมาแล้ว บ่ไปเก็บไว้หม้องเก่า คนอื่นที่เขาสิมาเบิ่ง หลือว่าอาดสิเอามาอ่าน เขากะหาเหล้มนั้นบ่พ้อ หาเหล้มนี้บ่พ้อ เพาะว่าคนที่เอาไปอ่านนั้น บ่มาเก็บไว้หม้องเก่า เอาไปอ่านแล้วกะเอาไปถิ้มไว้หม้องอื่น เอาไปวางไว้หม้องอื่น คนอื่นกะบ่สามาดหาเหล้มหนังสือนี้ได้

Basic vocabulary — page 09 — Series B, pictures 09-14: river, bridge, to cross, to walk, bike, motorbike, car

9
นี้คืออี่หยัง นี้คือแม่น้ำ แม่น้ำสายบักญาวหนึ่ง
อยู่ข้างแม่น้ำกะมีต้นไม้พ้อม มีต้นไม้ต้นบักใหญ่หนึ่ง มีบักหลายต้น
แล้วกะมีหญ้าพ้อม หญ้ากะเกิดอยู่ข้างต้นไม้ แล้วหญ้ากะเกิดอยู่ข้างแม่น้ำพ้อม
หญ้ามีหลายต้นบ่ มีหลายอยู่ หญ้ามีหลายต้น หลายบักคักหนึ่ง
แม่น้ำสายนี้ข้ามได้บ่ บ่ แม่น้ำสายนี้ข้ามบ่ได้ เพาะว่ามันบ่มีสะพานให้ข้าม มันกะเลยข้ามบ่ได้ เฮากะเลยบ่สามาดข้ามแม่น้ำนี้ได้
แม่น้ำสายนี้ไหลไปใส บ่ลู้คือกันจักว่าแม่น้ำสายนี้ไหลไปใส อาดสิไหลไปทะเล หลือไหลไปนำคองใหญ่ๆ กะได้

10
นี้คืออี่หยัง นี้คือแม่น้ำ แม่น้ำสายบักใหญ่หนึ่ง สายญาวพ้อม
อยู่ข้างแม่น้ำกะมีหนทางพ้อม มีหนทางสายบักญาว มีหนทางบักใหญ่หนึ่ง
แล้วแม่น้ำสายนี้มีสะพานเซี้ยมหนทาง เพื่อที่ใซ้ข้ามแม่น้ำสายนี้
สะพานมันอันใหญ่บ่ ใหญ่อยู่ สะพานมันใหญ่หลาย มันใหญ่บักคักหนึ่ง
สะพานอันนี้มันสามาดข้ามแม่น้ำสายนี้ได้ มันกะเลยอันบักใหญ่หนึ่ง
สะพานอันนี้มีละเบียงพ้อมแม่นบ่ แม่น สะพานอันนี้มีละเบียงพ้อม สะพานอันนี้มีละเบียงอยู่
อยู่ขอบสะพานมีละเบียงพ้อม เพื่อที่สิให้คนญ่างไปญ่างมา เพื่อที่สิได้จับฮั้วหลือละเบียงสะพานนี้
แล้วอยู่เทิงหนทางนี้ บ่มีคนอยู่เลย บ่มีใผอยู่หนี้จักคนเลย

11
เขากำลังเฮ็ดหญัง มีพุหญิงพุหนึ่ง เขากำลังญ่างข้ามสะพาน จักว่าเขาสิญ่างไปใส เขากำลังญ่างข้ามสะพานอันนี้ไป
เขากำลังญ่างไปพุเดียว บ่มีพุใดอยู่กับเขาเลย
เขามาแต่ใส บ่ลู้คือกันจักว่าเขามาแต่ใส แต่ว่าเห็นเขาญ่างมาแต่ทางหลัง แต่บ่ลู้ว่าเขาญ่างมาแต่ใส
แล้วเขาสิญ่างไปใส บ่ลู้คือกันจักว่าเขาสิญ่างไปใส เห็นแต่เขาญ่างข้ามสะพานนี้ซื่อๆ

12
เขากำลังเฮ็ดหญัง มีเด็กน้อยพุหนึ่ง เขากำลังถีบจักกะย๊าน
เขาถีบจักกะย๊านไปทางหน้า เขากำลังถีบจักกะย๊านข้ามสะพาน
จักว่าเขาสิไปใส กะบ่ลู้นำเขา เห็นเขาถีบอยู่พุเดียว
ตอนนี้เขาข้ามสะพานไป่ บ่ เขาบ่ทันได้ข้ามสะพานเลย ตอนนี้เขากำลังถีบจักกะย๊านอยู่เทิงสะพาน
เขาอาดสิเป็นเด็กน้อย เขากะเลยไปค่อยๆ เขาอาดสิบ่ถีบจักกะย๊านเล็วกะได้
จักกะย๊านอันนี้มีสองล้อแม่นบ่ แม่น จักกะย๊านอันนี้มีสองล้อ

13
เขากำลังเฮ็ดหญัง มีพุซายพุหนึ่ง เขากำลังขับมอเตอไซ เขากำลังขับมอเตอไซไปทางหน้า จักว่าเขาสิไปใส ตอนนี้เขากำลังขับมอเตอไซขึ้นสะพาน กำลังข้ามสะพาน จักว่าเขาสิไปใส
ตอนนี้เขาข้ามสะพานไป่ บ่ เขาบ่ทันได้ข้ามสะพาน เขากำลังขับอยู่เทิงสะพาน บ่ทันได้ข้ามสะพานไปทางหน้าอยู่
เขาขับมอเตอไซ มอเตอไซมันมีสองล้อ แล้วเขากะขับไปเลี้ยยๆ
เขาใส่หมวกกันน็อกพ้อม หมวกกันน็อกของเขาใบสีแดง ใบบ่ใหญ่ ใบอันน้อยๆ หนึ่ง

14
เขากำลังเฮ็ดหญัง เขากำลังขับลด ขับลดเก็ง ขับไปทางหน้า
เขาขับอยู่ใส เขาขับอยู่เทิงสะพาน ตอนนี้เขากำลังขับอยู่เทิงสะพาน กำลังสิข้ามสะพาน แต่ว่าบ่ทันได้ข้ามสะพานไป เขากำลังสิขับไปทางหน้า เขากะขับไปเลี้ยยๆ แต่ว่าบ่ทันได้ข้ามสะพานไป
ลดเก็งคันนี้มีจักล้อ ลดเก็งคันนี้มีสี่ล้อ
ลดเก็งคันสีเหลียง คันบ่ใหญ่ คันพอดี
คันบ่ใหญ่ คันบ่ใหญ่หลาย คันบ่น้อยหลาย คันพอดี